យោងតាមការអះអាងរបស់ក្រសួងសុខាភិបាលហ្កាហ្សា និងយោធាអ៊ីស្រាអែល បានឲ្យដឹងថា កងកម្លាំងអ៊ីស្រាអែល បានឃាត់ខ្លួនជនប៉ាឡេស្ទីនជាង ២៤០នាក់ រួមទាំងបុគ្គលិកពេទ្យ និងប្រធានមន្ទីរពេទ្យនៅតំបន់ភាគខាងជើងហ្កាហ្សា ។

កងទ័ពអ៊ីស្រាអែល បានបញ្ចេញរូបភាពវីដេអូឃ្លីបកាលពីថ្ងៃសៅរ៍ បង្ហាញពីប្រតិបត្តិការវាយឆ្មក់របស់ពួកគេនៅមន្ទីរពេទ្យ Kamal Adwan ។

យោធាអ៊ីស្រាអែល និយាយថា មន្ទីរពេទ្យ Kamal Adwan ត្រូវបានប្រើប្រាស់ជាទីបញ្ជាការសម្រាប់ប្រតិបត្តិការយោធាហាម៉ាស់ ហើយមនុស្សទាំងអស់នោះ ត្រូវបានចាប់ខ្លួនសង្ស័យថាជាក្រុមជីវពល ។

កាលពីថ្ងៃសុក្រ ក្រុមហាម៉ាស់ បានចាត់ទុកថាជាការភូតកុហសចំពោះអំណះអំណាងរបស់អ៊ីស្រាអែលដែលថាក្រុមសកម្មប្រយុទ្ធរបស់ពួកគេ បានប្រតិបត្តិការចេញពីមន្ទីរពេទ្យមួយនេះ ពេញមួយសង្រ្គាមរយៈពេល ១៥ខែនៅតំបន់ហ្កាហ្សា ដោយពួកគេអះអាងថា គ្មានក្រុមសកម្មប្រយុទ្ធណាម្នាក់ នៅក្នុងមន្ទីរពេទ្យមួយនេះឡើយ ។ 

ក្រសួងសុខាភិបាលហ្កាហ្សា និយាយថា អ្នកជំងឺមួយចំនួន ត្រូវបានជម្លៀសចេញពីមន្ទីរពេទ្យ Kamal Adwan ទៅកាន់មន្ទីរពេទ្យឥណ្ឌូនេស៊ី ដែលពុំមានបម្រើសេវាកម្មនោះឡើយ ហើយគ្រូពេទ្យបឋម ត្រូវបានហាមឃាត់ពីការជួយព្យាបាលពួកគេនៅទីនោះ ។ អ្នកជំងឺផ្សេងទៀត និងបុគ្គិលមន្ទីរពេទ្យ ត្រូវបានបញ្ជូនទីកាន់មណ្ឌលសុខភាពផ្សេងទៀត ។

យោធាអ៊ីស្រាអែល និយាយថា អ្នកជំងឺ និងបុគ្គលិកមន្ទីរពេទ្យចំនួន ៣៥០នាក់ ត្រូវបានជម្លៀសចេញមុនប្រតិបត្តិការនៅមន្ទីរពេទ្យ Kamal Adwan ខណៈមនុស្ស ៩៥នាក់ផ្សេងទៀត ត្រូវបានជម្លៀសចេញទៅកាន់មន្ទីរពេទ្យឥណ្ឌូនេស៊ី អំឡុងពេលប្រតិបត្តិការ ដោយមានការសម្របសម្រួលជាមួយអាជ្ញាធរសុខភាពក្នុងស្រុក ៕