មុនពេលជិតឆ្លងឆ្នាំចាស់ចូលដល់ឆ្នាំថ្នី ឆ្នាំសកល ២០២៥ខាងមុខនេះ ប្រជាពលរដ្ឋរស់នៅក្នុងតំបន់អ៊ុយក្រែនគ្រប់គ្រងដោយរុស្ស៊ី បាននិយាយថា ពួកគេសង្ឃឹមថា នឹងមានការដោះស្រាយសន្តិភាពក្នុងជម្លោះកំពុងបន្តនៅឆ្នាំ ២០២៥ខាងមុខនេះ ។

លោក Igor Gontar គឺជាពលរដ្ឋមួយរូបរស់នៅក្នុងទីក្រុង Sevastopol ស្ថិតក្នុងតំបន់គ្រីមៀ និយាយប្រាប់ទីភ្នាក់ងារព័ត៌មានរ៉យទ័រថា លោកចង់បានសុវត្ថិភាពសម្រាប់ក្មេងៗ ហើយលោករំពឹងថា កិច្ចព្រមព្រៀងសន្តិភាពនឹងត្រូវបង្កើតឡើង ក្រោយលោក Donald Trump ចូលកាន់តំណែងនៅសេតវិមាន ។

ចំណែកឯ លោក Vasiliy Yatsev ដែលជាពលរដ្ឋមួយរូបទៀតរស់នៅក្នុងទីក្រុង Sevastopol ដែរនោះ មានមន្ទិលសង្ស័យចំពោះឆន្ទៈរបស់រដ្ឋបាលថ្មីសហរដ្ឋអាមេរិក ក្នុងការបញ្ចប់សង្រ្គាមមួយនេះ ។

លោកនិយាយថា ពេលលោក Trumpជាប្រធានាធិបតីសហរដ្ឋអាមេរិក លោកបានណែនាំឲ្យដាក់ទណ្ឌកម្មរុស្ស៊ី ដូច្នេះហើយលោកមិនរំពឹងថានឹងមានអ្វីល្អពីគាត់នោះទេ ។

ខណៈពេលនោះដែរ ប្រជាពលរដ្ឋរស់នៅក្នុងទីក្រុង Mariupol បន់ស្រន់ឲ្យឆ្នាំក្រោយសង្រ្គាមនឹងបញ្ចប់ផងដែរ ។ លោក Roman ដែលជាពលរដ្ឋរស់នៅក្នុងទីក្រុងមួយនេះ យល់ឃើញវិជ្ជមានថា លោក Putin និងលោក Trump នឹងឈានដល់កិច្ចព្រមព្រៀងសន្តិភាព ។ លោកនិយាយថា លោកគិតថា ពួកគេនឹងបង្កើតកិច្ចព្រមព្រៀង ហើយសង្រ្គាមមួយនេះ នឹងត្រូវបញ្ចប់ ។

គួរឲ្យដឹងថា ប្រធានាធិបតីរុស្ស៊ីលោក Vladimir Putin បាននិយាយកាលពីថ្ងៃទី ១៩ ខែធ្នូកន្លងទៅថា លោកត្រៀមខ្លួនរួចរាល់ក្នុងការសម្របសម្រួលលើបញ្ហាសង្រ្គាមអ៊ុយក្រែន នៅក្នុងកិច្ចចរចាដែលអាចកើតឡើងបានជាមួយប្រធានាធិបតីជាប់ឆ្នោតសហរដ្ឋអាមេរិកលោក Donald Trump លើការបញ្ចប់សង្រ្គាម ប៉ុន្តែលោកគ្មានលក្ខខណ្ឌសម្រាប់ការចាប់ផ្តើមការជជែកចរចាជាមួយក្រុមអាជ្ញាធរអ៊ុយក្រែននោះឡើយ ៕