សេវាកម្មពន្លត់អគ្គិភ័យកូរ៉េខាងត្បូង និយាយថា មនុស្សយ៉ាងហោច ៦២នាក់ បានស្លាប់ក្នុងហេតុការណ៍ធ្លាក់យន្តហោះដឹកមនុស្ស ១៨១នាក់ នៅកូរ៉េខាងត្បូង ។

យោងតាមការអះអាងរបស់ទីភ្នាក់ងារពន្លត់អគ្គិភ័យជាតិ បានឲ្យដឹងថា មនុស្ស ៦២នាក់ដែលបានស្លាប់ រួមមានស្រ្តី ៣៧នាក់ និងបុរស ២៥នាក់ ។

 ទីភ្នាក់ងារព័ត៌មាន Yonhap បានរាយការណ៍ថា យន្តហោះបានចុះចតផុតផ្លូវរត់ រួចបុកជញ្ជាំងនៅអាកាសយានដ្ឋានអន្តរជាតិ Muan ស្ថិតនៅតំបន់ភាគនិរតីកូរ៉េខាងត្បូង ។

យន្តហោះរបស់ក្រុមហ៊ុនអាកាសចរណ៍ Jeju ដែលដឹកអ្នកដំណើរ ១៧៥នាក់ និងអាកាសយានិក ៦នាក់ ត្រូវបានគេរាយការណ៍ថា ហោះត្រឡប់ពីប្រទេសថៃវិញ ហើយឧបទ្ទេវហេតុនេះ បានកើតឡើងអំឡុងពេលចុះចត ។

មន្រ្តីពន្លត់អគ្គិភ័យមួយរូប និយាយប្រាប់ទីភ្នាក់ងារព័ត៌មានរ៉យទ័រថា មនុស្ស ២នាក់ ត្រូវបានរកឃើញថានៅរស់មកទល់នឹងពេលនេះ ហើយប្រតិបត្តិការជួយសង្រ្គោះ កំពុងបន្ត ។

មន្រ្តីអាកាសយានដ្ឋាន និយាយថា សេវាកម្មសង្រ្គោះបន្ទាន់ បានព្យាយាមសង្រ្គោះមនុស្សនៅផ្នែកកន្ទុយរបស់យន្តហោះ ។

ទីភ្នាក់ងារព័ត៌មាន Yonhap រាយការណ៍ថា អ្នកដំណើរនៅលើយន្តហោះរួមមានពលរដ្ឋកូរ៉េខាងត្បូង ១៧៣នាក់ និងជនជាតិថៃ ២នាក់ ។

ដោយឡែក មូលហេតុដែលបណ្តាលឲ្យធ្លាក់យន្តហោះនេះ ពុំត្រូវបានដឹកច្បាស់ភ្លាមៗនោះទេ ប៉ុន្តែសារព័ត៌មានក្នុងស្រុក រាយការណ៍ថា វាអាចបណ្តាលមកពីហ្វូងសត្វស្លាប ដែលជាប់នៅក្នុងម៉ាស៊ីនយន្តហោះ ៕