បាតុករកូរ៉េខាងត្បូងរាប់ម៉ឺននាក់ នាំគ្នាដង្ហែរក្បួនកាលពីថ្ងៃសៅរ៍ អំពាវនាវឲ្យមានការលាលែងពីតំណែងជាបន្ទាន់របស់ប្រធានាធិបតីរងការចោទប្រកាន់លោក Yoon Suk Yeol ។

 ហ្វូងមនុស្សដ៏ច្រើនលើសលប់ បានជួបជុំគ្នានៅទីប្រជុំជនទីក្រុងសេអ៊ូល គ្រវីដំបងភ្លើង បដា និងប៉ោងប៉ោងមានសារប្រឆាំងលោក Yoon ខណៈពួកគេស្រែកពាក្យស្លោកឲ្យលោក Yoon ចុះចេញពីតំណែង ។

 តុលាការធម្មនុញ្ញនឹងបើកសវនាការលើកទី ២នៅសប្តាហ៍ក្រោយ ដើម្បីពិនិត្យមើលថាតើ ត្រូវប្រគល់តំណែងដល់លោក Yoonវិញ ឬមួយក៏ត្រូវដកតំណែងលោកជាអចិន្រ្តៃយ៍ ។ ពួកគេមានរយៈពេល ១៨០ថ្ងៃ ដើម្បីឈានដល់ការសម្រេចចិត្ត ។

 ដោយឡែក លោកនាយករដ្ឋមន្រ្តី Han Duck-soo ដែលក្លាយជាប្រធានាធិបតីស្តីទី ចាប់តាំងពីលោក Yoonរងការចោទប្រកាន់កាលពីថ្ងៃទី ១៤ ខែធ្នូ សម្រាប់ការប្រកាសច្បាប់អាជ្ញាសឹកកាលពីថ្ងៃទី ៣ ខែធ្នូនោះ រូបលោកផ្ទាល់ត្រូវបានចោទប្រកាន់ផងដែរកាលពីថ្ងៃសុក្រ ក្រោយលោកបដិសេធន៍សំណើរបស់គណបក្សប្រឆាំងឲ្យតែងតាំងបន្ទាន់ចៅក្រម ៣រូប បំពេញតំណែងទំនេរនៅក្នុងតុលាការធម្មនុញ្ញ ។

 ដោយឡែក លោក Choi Sang-mokដែលជារដ្ឋមន្រ្តីក្រសួងហិរញ្ញវត្ថុកូរ៉េខាងត្បូង បានក្លាយជាប្រធានាធិបតីស្តីទីថ្មីរបស់កូរ៉េខាងត្បូង ហើយលោក បាននិយាយនៅថ្ងៃសុក្រកន្លងទៅថា រដ្ឋាភិបាលរបស់លោកបានបញ្ជាឲ្យយោធាបង្កើនការប្រុងប្រយ័ត្នខ្ពស់ ដោយលើកឡើងពីលទ្ធភាពដែលកូរ៉េខាងជើងអាចឆ្មក់ឱកាសពីស្ថានភាពនយោបាយរបស់ខ្លួន ដើម្បីធ្វើសកម្មភាពបង្ករឿងណាមួយ ៕