បាល់ទាត់៖ ការប្រកួតក្របខណ្ឌលីគកំពូលកម្ពុជាបានត្រឡប់មកវិញហើយ ក្រោយផ្អាក ១ខែដោយសារក្រុមជម្រើសជាតិ និងក្រុមជម្រើសជាតិអាយុក្រោម ២៣ឆ្នាំកម្ពុជាត្រូវបេសកកម្មប្រកួតជម្រុះពានរង្វាន់ប្រចាំទ្វីបអាស៊ីកាលពីថ្មីៗ ដោយក្រុមអង្គរថាយហ្គឺរនឹងត្រូវបើកទ្វារផ្ទះសងសឹកក្រុមវិសាខានាវេលាម៉ោង ៣៖៣០នាទីរសៀលថ្ងៃទី០៣ ខែវិច្ឆិកានេះនៅកីឡដ្ឋាន SRU ខេត្តសៀមរាប។
កាលពីជើងទី១ ក្រុមមានមូលដ្ឋាននៅខេត្តសៀមរាបនេះបានបរាជ័យ ៣-១ នៅលើទឹកដីវិសាខា។ ដូច្នេះនេះគឺជាការប្រកួតសងសឹកដើម្បីប្រជែងចំណាត់ថ្នាក់ល្អក្នុងលីគ បន្ទាប់ពីពួកគេអស់ឱកាសប្រជែងជើងឯក។ រីឯវិសាខាត្រូវការឈ្នះដាច់ខាតក្នុងជំនួបបង្គ្រប់សប្ដាហ៍ទី១៥ នេះដើម្បីរក្សាឱកាសប្រជែងពានជាមួយគូប្រជែង ៣ក្រុមទៀត ពិសេសក្រុមកំពូលតារាងភ្នំពេញក្រោនតែម្ដង។ ជាមួយការត្រឡប់មកវិញនៃលីគកំពូលកម្ពុជានេះ ក្លិបអង្គរថាយហ្គឺរក៏បានប្រកាសផ្ដល់សំបុត្រចំនួន ២ពាន់កៅអីដោយឥតគិតថ្លៃដល់អ្នកគាំទ្រ ដើម្បីជាការអបអរសាទរបន្ទាប់ពីគណៈកម្មការប្រកួតបាល់ទាត់ជាតិកម្ពុជា-CNCC អនុញ្ញាតឲ្យទស្សនិកជនចូលទស្សនាការប្រកួតឡើងវិញបានចំនួន ៥០% នៃចំនួនកៅអីសរុបក្នុងកីឡដ្ឋាននីមួយៗ ក្រោយរាជរដ្ឋាភិបាលបានប្រកាសបើកដំណើរការប្រទេសឡើងវិញផងដែរ។ គួរបញ្ជាក់ថា បច្ចុប្បន្នអង្គរថាយហ្គឺរកំពុងឈរលេខ៦ និងមាន ២៧ពិន្ទុហើយសល់ ៣ប្រកួតក្នុងដៃដូចវិសាខាដែរ តែវិសាខាសល់ឱកាសប្រជែងពានដ្បិតពួកគេកំពុងឈរលេខ៣ និងមាន ៣៥ពិន្ទុតាមពីក្រោយក្រុមកំពូលតារាងភ្នំពេញក្រោន ៥ពិន្ទុ និងតាមពីក្រោយក្រុមព្រះខ័នរាជស្វាយរៀង ១ពិន្ទុ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
