ប្រធានាធិបតីស្តីទីរបស់កូរ៉េខាងត្បូង លោក Choi Sang-mok បានទៅដល់កន្លែងកើតហេតុនៃគ្រោះមហន្តរាយផ្លូវអាកាសដ៏កាចសាហាវបំផុតនៅលើដីរបស់ប្រទេសនៅថ្ងៃអាទិត្យ (២៩ ធ្នូ) បន្ទាប់ពីបានចូលកាន់តំណែងតិចជាង ៤៨ម៉ោង ដែលនេះជាការសាកល្បងដ៏ធំលើសមត្ថភាពដោះស្រាយបញ្ហារបស់លោក។

លោក Choi ដែលជារដ្ឋមន្ត្រីហិរញ្ញវត្ថុ បានក្លាយជាមេដឹកនាំស្តីទីកាលពីយប់ថ្ងៃសុក្រ បន្ទាប់ពីការចោទប្រកាន់ទម្លាក់តំណែងលោកនាយករដ្ឋមន្ត្រី Han Duck-soo ដែលបានធ្វើជាប្រធានាធិបតីស្តីទីចាប់តាំងពីលោកប្រធានាធិបតី Yoon Suk Yeol ត្រូវបានចោទប្រកាន់ទម្លាក់តំណែង ហើយត្រូវបានផ្អាកពីអំណាចនៅថ្ងៃទី១៤ ខែធ្នូ បន្ទាប់ពីការប៉ុនប៉ងដាក់ច្បាប់អាជ្ញាសឹករយៈពេលខ្លីរបស់លោក។

ស្ថានការណ៍ដ៏គួរឱ្យភ្ញាក់ផ្អើលនៅក្នុងប្រទេសសេដ្ឋកិច្ចធំបំផុតទី៤ របស់អាស៊ី និងប្រទេសមួយដែលមានលទ្ធិប្រជាធិបតេយ្យដ៏រស់រវើកបំផុតនេះ កាន់តែច្របូកច្របល់នៅពេលយន្តហោះ Jeju Air ជើងហោះហើរ 7C2216 បានធ្លាក់នៅថ្ងៃអាទិត្យ សម្លាប់មនុស្សភាគច្រើនក្នុងចំណោមមនុស្ស ១៨១នាក់នៅលើយន្តហោះ។

លោក Choi បានទៅមើលកន្លែងនោះពីរបីម៉ោងបន្ទាប់ពីការធ្លាក់ ហើយបានប្រកាសដាក់ជាជាតំបន់គ្រោះមហន្តរាយពិសេស។ នៅពីក្រោយស្ថានភាពនេះ ការិយាល័យរដ្ឋាភិបាលនៅតែកំពុងលំបាកគិតថាតើត្រូវរាយការណ៍ជូនអ្នកណា និងចេញសេចក្តីថ្លែងការណ៍សារព័ត៌មានដូចម្ដេច ខណៈជួររដ្ឋាភិបាលកំពុងរញ៉េរញ៉ៃ៕