លោកប្រធានាធិបតីស្តីទី ឈែ សាងម៉ុក (Choi Sang-mok) បាននិយាយនៅថ្ងៃចន្ទនេះថា លោក តក់ស្លត់ខ្លាំងណាស់ចំពោះឧបទ្ទវេហតុយន្តហោះដ៏សោកនាដកម្មនេះ ដោយទទួលស្គាល់ភាពតានតឹងបន្ថែមកើតឡើងនៅលើសាធារណៈជនដែលកំពុងប្រឈមនឹងបញ្ហាសេដ្ឋកិច្ចរួចហើយ។

កាលពីថ្ងៃអាទិត្យលោកបានប្រកាសកាន់មរណទុក្ខទូទាំងប្រទេសរយៈពេល១សប្ដាហ៍ជុំវិញឧបទ្ទវហេតុយន្តហោះនេះ ។

លោកឈែ បានប្រកាសបែបនេះ ក្នុងពេលចូលរួមជាអធិបតីក្នុងកិច្ចប្រជុំគ្រប់គ្រងគ្រោះមហន្តរាយនៅទីក្រុងសេអ៊ូល បន្ទាប់ពីយន្តហោះ Jeju Air ដែលផ្ទុកមនុស្សចំនួន១៨១ នាក់បានជួបឧបទ្ទវហេតុ និងបានផ្ទុះឆេះនៅអាកាសយានដ្ឋានមួយក្នុងស្រុក មូអាន (Muan) ភាគនិរតីរបស់ប្រទេសនេះកាលពីព្រឹកថ្ងៃអាទិត្យ។

ឧបទ្ទវហេតុអាកាសចរណ៍ដ៏អាក្រក់បំផុតរបស់ប្រទេសក្នុងរយៈពេលជាច្រើនឆ្នាំបានឆក់យកជីវិតមនុស្ស ១៧៩ នាក់ ដោយមានអ្នករស់រានមានជីវិតពីរនាក់ត្រូវបានជួយសង្គ្រោះ។

លោកបាននិយាយថា ក្នុងនាមជាប្រធានាធិបតីស្តីទី បេះដូងខ្ញុំឈឺចាប់ពេលយើងជួបសោកនាដកម្មដ៏អាក្រក់បែបនេះស្របពេលមានវិបត្តិសេដ្ឋកិច្ចថ្មីៗនេះ។

លោក ឈែ ដែលកាន់តំណែងជាឧបនាយករដ្ឋមន្ត្រីទទួលបន្ទុកកិច្ចការសេដ្ឋកិច្ច និងជារដ្ឋមន្ត្រីហិរញ្ញវត្ថុ បានចូលកាន់តំណែងជាមេដឹកនាំបណ្តោះអាសន្នកាលពីថ្ងៃសុក្រ បន្ទាប់ពីការព្យួរភារកិច្ចរបស់ប្រធានាធិបតីស្តីទីលោក Han Duck-soo ដោយរដ្ឋសភា៕