លោក Jimmy Carter អតីតប្រធានាធិបតីអាមេរិក ដែលបានជួបការលំបាកក្នុងអំឡុងពេលសេដ្ឋកិច្ចដ៏អាក្រក់ និងវិបត្តិចំណាប់ខ្មាំងអ៊ីរ៉ង់ ប៉ុន្តែបានសម្របសម្រួលសន្តិភាពរវាងអ៊ីស្រាអែល និងអេហ្ស៊ីប ហើយក្រោយមកបានទទួលពានរង្វាន់ណូបែលសន្តិភាពសម្រាប់ការងារមនុស្សធម៌របស់ខ្លួន បានទទួលមរណភាពឯលំនៅឋានរបស់លោកក្នុងទីក្រុង Plains រដ្ឋ Georgia នៅថ្ងៃអាទិត្យ (២៩ ធ្នូ) ក្នុងវ័យ ១០០ឆ្នាំ។

លោកប្រធានាធិបតី Joe Biden ប្រធានាធិបតីជាប់ឆ្នោត លោក Donald Trump អ្នកនយោបាយអាមេរិក និងបណ្ដាមេដឹកនាំពិភពលោក បានសម្ដែងមរណទុក្ខសម្រាបក្រុមគ្រួសាររបស់លោក Carter។

ក្នុងនាមជាអ្នកនយោបាយបក្សប្រជាធិបតេយ្យ លោក Carter ធ្វើជាប្រធានាធិបតីពីខែមករា ឆ្នាំ១៩៧៧ ដល់ខែមករា ឆ្នាំ១៩៨១ បន្ទាប់ពីឈ្នះប្រធានាធិបតីបក្សសាធារណរដ្ឋដែលកំពុងកាន់អំណាចនៅពេលនោះ គឺលោក Gerald Ford នៅក្នុងការបោះឆ្នោតអាមេរិកឆ្នាំ១៩៧៦។ បួនឆ្នាំក្រោយមក លោក Carter បានចាញ់ឆ្នោតទល់នឹងគូប្រជែងបក្សសាធារណរដ្ឋ គឺលោក Ronald Reagan អតីតតារាសម្ដែង និងអភិបាលរដ្ឋ California។

ក្នុងប៉ុន្មានឆ្នាំថ្មីៗនេះ លោក Carter បានជួបប្រទះបញ្ហាសុខភាពជាច្រើន រួមទាំងជំងឺមហារីកស្បែក ដែលរាលដាលដល់ថ្លើម និងខួរក្បាល។ លោកបានសម្រេចចិត្តទទួលការព្យាបាលថែទាំក្នុងខែកុម្ភៈ ឆ្នាំ២០២៣ ជំនួសឱ្យការវះកាត់ផ្នែកវេជ្ជសាស្រ្តបន្ថែម។ ភរិយារបស់លោកឈ្មោះ លោកស្រី Rosalynn Carter ក៏បានទទួលមរណភាពនៅថ្ងៃទី១៩ ខែវិច្ឆិកា ឆ្នាំ ២០២៣ ក្នុងអាយុ ៩៦ឆ្នាំ៕