ភាគហ៊ុនរបស់ក្រុមហ៊ុនអាកាសចរណ៍កូរ៉េខាងត្បូង Jeju Air បានធ្លាក់ចុះដល់កម្រិតទាបបំផុតក្នុងកំណត់ត្រានៅថ្ងៃចន្ទ (៣០ ធ្នូ) នេះ បន្ទាប់ពីឧប្បត្តិហេតុធ្លាក់យន្តហោះដ៏អាក្រក់បំផុតរបស់ប្រទេស បានសម្លាប់មនុស្ស ១៧៩នាក់។

ភាគហ៊ុនរបស់ Jeju Air បានធ្លាក់ចុះ ៨,៤% គិតត្រឹមម៉ោង០០:៥៨ (ម៉ោងសកល) បន្ទាប់ពីបានធ្លាក់ចុះ ១៥,៧% មុននោះ ត្រឹមតម្លៃ ៦.៩២០វ៉ុន ដែលជាតម្លៃទាបបំផុតចាប់តាំងពីបានចុះបញ្ជីក្នុង២០១៥ មក។

ភាគហ៊ុនរបស់ AK Holdings ដែលជាក្រុមហ៊ុនកាន់កាប់ Jeju Air បានធ្លាក់ចុះដល់ទៅ ១២% ហើយក៏បានធ្លាក់ចុះដល់កម្រិតទាបបំផុតក្នុងពេល ១៦ឆ្នាំ។

មហន្តរាយកាលពីថ្ងៃអាទិត្យនៅឯអាកាសយានដ្ឋានអន្តរជាតិ Muan គឺជាគ្រោះថ្នាក់ជើងហោះហើរដ៏អាក្រក់បំផុតដំបូងគេសម្រាប់ Jeju Air ដែលជាក្រុមហ៊ុនអាកាសចរណ៍តម្លៃទាបមួយ បង្កើតឡើងក្នុងឆ្នាំ២០០៥ និងជាក្រុមហ៊ុនអាកាសចរណ៍ធំជាងគេទីបីរបស់ប្រទេស គិតលើចំនួនអ្នកដំណើរ។

ក្រុមហ៊ុនអាកាសចរណ៍ធំៗពីររបស់កូរ៉េខាងត្បូង Korean Air Lines ធ្លាក់ចុះ ១,៣% និង Asiana Airlines បានធ្លាក់ចុះ ០,៨%។ ភាគហ៊ុនទីភ្នាក់ងារទេសចរណ៍ក៏ធ្លាក់ចុះផងដែរ ជាមួយនឹងក្រុមហ៊ុន Hanatour Service ធ្លាក់ចុះដល់ទៅ ៧% និង Very Good Tour ធ្លាក់ចុះរហូតដល់ ១១%៕