មេដឹកនាំប្រទេសស៊ីរី លោក Ahmed al-Sharaa បាននិយាយនៅក្នុងការថ្លែងសុន្ទរកថា ដែលត្រូវបានចាក់ផ្សាយកាលពីថ្ងៃអាទិត្យថា ការរៀបចំការបោះឆ្នោតនៅក្នុងប្រទេសស៊ីរី អាចចំណាយពេលរហូតដល់បួនឆ្នាំ ជាលើកដំបូងដែលលោកបានអត្ថាធិប្បាយស្តីពីពេលវេលានៃការបោះឆ្នោតដែលអាចធ្វើទៅបាន ចាប់តាំងពី លោក Bashar al-Assad ត្រូវបានបណ្តេញចេញពីតំណែង នៅក្នុងខែនេះ។

លោក Sharaa បាននិយាយនៅក្នុងការដកស្រង់ពីបទសម្ភាសន៍ជាមួយទូរទស្សន៍រដ្ឋអារ៉ាប៊ីសាអូឌីត Al Arabiya ថា ការពង្រាងរដ្ឋធម្មនុញ្ញថ្មី អាចចំណាយពេលរហូតដល់បីឆ្នាំ។

លោក និយាយថា វានឹងត្រូវចំណាយពេលប្រហែលមួយឆ្នាំសម្រាប់ប្រជាជនស៊ីរី ដើម្បីមើលឃើញពីការផ្លាស់ប្តូរច្រើន។

ការអត្ថាធិប្បាយរបស់លោក Sharaa ដឹកនាំក្រុម Hayat Tahrir al-Sham ដែលបានបណ្តេញលោក Assad កាលពីថ្ងៃទី៨ ខែធ្នូ ធ្វើឡើងខណៈរដ្ឋាភិបាលថ្មីនៅទីក្រុងដាម៉ាស កំពុងស្វែងរកការធានាដល់ប្រទេសជិតខាងថា ខ្លួនបានផ្លាស់ប្តូរចេញពីឫសគល់នៃក្រុមសកម្មប្រយុទ្ធអ៊ីស្លាមនិយម។

យុទ្ធនាការលឿនដូចផ្លេកបន្ទោររបស់ក្រុមនេះ បានបញ្ចប់សង្គ្រាមស៊ីវិលរយៈពេល១៣ឆ្នាំ ប៉ុន្តែបានបន្សល់ទុកនូវសំណួរជាច្រើនអំពីអនាគតរបស់ប្រទេសពហុជនជាតិភាគតិចមួយនេះ។