នៅឆ្នាំ២០២៤នេះ អគ្គនាយកដ្ឋានធនធានមនុស្ស នៃក្រសួងមហាផ្ទៃ បានអភិវឌ្ឍ និង​ធ្វើ​ទំនើប​កម្ម​ប្រព័ន្ធគ្រប់គ្រងទិន្នន័យមន្រ្តីរាជការ ស្ថិតក្រោមសមត្ថកិច្ចរបស់ក្រសួងមហាផ្ទៃ។ ការអភិវឌ្ឍ និង​ធ្វើទំនើបកម្មនេះទទួលបានលទ្ធផលជាច្រើនគួរឲ្យកត់សំគាល់។

ឯកឧត្តម នាយឧត្តមសេនីយ៍សាស្រ្តចារ្យ សេង ផល្លី អគ្គនាយកនៃអគ្គនាយកដ្ឋានធនធានមនុស្ស ក្រសួងមហាផ្ទៃ នៅព្រឹកថ្ងៃទី៣០ ខែធ្នូនេះ បានអញ្ជើញជាអធិបតីបើក​សន្និបាតបូ​កស​រុប​ត្រួតពិ​និត្យ​លទ្ធផលការងារប្រចាំឆ្នាំ២០២៤ និងលើកទិសដៅការងារឆ្នាំ២០២៥ ស្ថិតនៅសាល​ប្រជុំ​ទីស្តី​ការ​ក្រសួងមហាផ្ទៃ អគារS ដែលមានអ្នកចូលរួមចំនួនប្រមាណជាង៧រយនាក់។

នៅក្នុងអង្គពិធី លោកឧត្តមសេនីយ៍ឯក ម៉ុក វណ្ណា ប្រធាននាយកដ្ឋានរដ្ឋបាល នៃ​អគ្គនាយក​ដ្ឋាន​ធន​ធាន​មនុស្សបា​នបង្ហាញពីលទ្ធផលការងារអភិវឌ្ឍ និងធ្វើទំនើបកម្មប្រព័ន្ធ​គ្រប់​គ្រង​ទិន្នន័យ​មន្រ្តី​រាជការ ដោយអគ្គនាយកដ្ឋានធនធានមនុស្សសម្រេចបានលទ្ធផលជាច្រើនដូចជា៖ បាន​បង្កើត និងកំពុងដាក់ឱ្យប្រើកម្មវិធីគ្រប់គ្រងវត្តមានមន្រ្តីនគរបាលជាតិ (VATTMEAN) នៅក្នុង Google Play និង App store និងកម្មវិធីសុំច្បាប់ និងការអនុញ្ញាតច្បាប់ឈប់ គ្រប់​ប្រភេទ​របស់​មន្ត្រី​នគរបាលជាតិតាម Web Application និង Mobile App។ បានរៀបចំ Domain និង Sub Domain ផ្លូវការរបស់អគ្គនាយកដ្ឋានធនធានមនុស្ស នៅក្រោម Domain ក្រសួង​មហាផ្ទៃ​សម្រា​ប់​ប្រព័ន្ធ​គ្រប់​គ្រងទិន្នន័យមន្ត្រីនគរបាលជាតិ និងកម្មវិធីសុំច្បាប់របស់មន្ត្រីនគរបាលជាតិ។ បាន Register Broadcom Account ជាមួយសារអេឡិកត្រូនិកផ្លូវការរបស់ក្រសួងមហាផ្ទៃ ដើម្បី​ធ្វើ​ការ​ផ្ទេរ Owner License មកក្រោមកម្មសិទ្ធិរបស់អគ្គនាយកដ្ឋានធនធានមនុស្ស និងបាន​ធ្វើ​បច្ចុប្បន្ន​ភាព​ទិន្នន័យដោយស្កែនរូបថតរបស់មន្រ្តីរាជការជាដើម។

គួរបញ្ជាក់ដែរថា សន្និបាតបូកសរុបត្រួតពិនិត្យលទ្ធផលការងារប្រចាំឆ្នាំ២០២៤ និង​លើក​ទិស​ដៅ​ការងារ​ឆ្នាំ​២០២៥ របស់អគ្គនាយកដ្ឋានធនធានមនុស្សនៃក្រសួងមហាផ្ទៃ រៀបចំឡើង​ក្នុង​គោល​បំណង​សំខាន់​ៗចំនួន ៣ គឺ រួមមាន៖ ទី១.ពិនិត្យ​របាយការណ៍​បូក​សរុប​លទ្ធផល​ការងារ​ឆ្នាំ​២០២៤ និងលើកទិសដៅ​ការងារ​បន្ត​សម្រាប់​ឆ្នាំ២០២៥ របស់អគ្គនាយកដ្ឋានធនធានមនុស្ស ទី២.​ចែករំលែកបទពិសោធន៍ល្អៗ បញ្ហាប្រឈម ដំណោះស្រាយ និងសំណូមពរ លើ​ការងារ​គ្រប់​គ្រង និងអភិវឌ្ឍធនធានមនុស្ស និង​ការអនុវត្ត​នូវលិ​ខិត​បទដ្ឋាន​គតិយុត្ត​នានា​ពាក់ព័ន្ធ​នឹង​ការងារ​បុគ្គលិក និងទី៣-ដាក់ចេញទិសដៅការងារបន្ត និងផែនការសកម្មភាពការងារប្រចាំឆ្នាំ២០២៥ ឱ្យ​ឆ្លើយ​តបទៅនឹង បេសកកម្ម គោលបំណង និងគោលដៅរបស់អគ្គនាយកដ្ឋានធនធានមនុស្ស និង​សំណូមពររបស់អង្គភាពពាក់ព័ន្ធចំណុះក្រសួងមហាផ្ទៃ និងរដ្ឋបាលរាជធានី ខេត្ត៕ អត្ថបទ៖ ទូច សោភ័ណ