អាហ្វហ្គានីស្ថាន៖ រដ្ឋាភិបាលតាលីបង់របស់ប្រទេសអាហ្វហ្គានីស្ថានបាននិយាយថា ខ្លួននឹងប្រកាសដំណឹងល្អក្នុងពេលឆាប់ៗនេះលើក្មេងស្រីវ័យជំទង់ត្រូវបានអនុញ្ញាតឱ្យចូលរៀនវិញ ប៉ុន្តែបានជំរុញសហគមន៍អន្តរជាតិឱ្យជួយផ្តល់មូលនិធិដល់ដំណើរការនេះ ខណៈជំនួយខាងក្រៅប្រទេសភាគច្រើនត្រូវបានផ្អាក។
ការធានាសិទ្ធិស្ត្រី និងក្មេងស្រីគឺជាបញ្ហាដ៏រសើបបំផុតមួយក្នុងចំណោមបញ្ហាជាច្រើន ដែលកំពុងរួមរឹតលើក្រុមតាលីបង់ចាប់តាំងពីក្រមនេះបានដណ្ដើមក្ដោបក្ដាប់អំណាចកាលពីខែសីហា ដោយស្ថាប័នអន្តរជាតិនានាទាមទារភស្តុតាងដែលបង្ហាញថា បញ្ហាទាំងនោះត្រូវបានគោរព និងដោះស្រាយ មុនពេលការពិភាក្សាអំពីការទទួលស្គាល់ជាផ្លូវការនៃរដ្ឋាភិបាលថ្មីកើតឡើង។ កាលពីខែកញ្ញា ចលនាអ៊ីស្លាមនិយមប្រកាន់តឹងមួយនេះបានបង្កឲ្យមានការថ្កោលទោសជាសកល នៅពេលដែលខ្លួនអនុញ្ញាតឱ្យក្មេងប្រុសត្រឡប់ទៅសាលារៀនវិញ ប៉ុន្តែបានប្រាប់ក្មេងស្រីវ័យជំទង់ឱ្យស្នាក់នៅផ្ទះ រហូតដល់លក្ខខណ្ឌនានាអនុញ្ញាតឱ្យពួកគេត្រឡប់ទៅសាលារៀនវិញ។ លោក Waheedullah Hashimi នាយកកម្មវិធីខាងក្រៅប្រព័ន្ធ និងជំនួយនៅក្រសួងអប់រំបានប្រាប់សារព័ត៌មាន Reuters ក្នុងបទសម្ភាសន៍មួយថា យើងនឹងមានការប្រកាសដំណឹងល្អសម្រាប់ប្រទេសទាំងមូល សម្រាប់ប្រជាជាតិទាំងមូល។
នៅតំបន់មួយចំនួនភាគខាងជើងប្រទេសនេះ ក្មេងស្រីបានបន្តការសិក្សារបស់ពួកគេរួចហើយ ប៉ុន្តែអ្នកផ្សេងទៀតត្រូវបានបង្ខំឱ្យសិក្សាដោយលួចលាក់។ ស្របពេលដែលរដ្ឋាភិបាលក្រុមតាលីបង់ប្រឈមនឹងការដួលរលំសេដ្ឋកិច្ច និងប្រាក់ជំនួយពីបរទេសត្រូវបានបង្កក ក្រុមតាលីបង់បានប្រកាសការហាមប្រាមទាំងស្រុងលើការប្រើប្រាស់រូបិយប័ណ្ណបរទេស នៅក្នុងប្រទេសអាហ្វហ្គានីស្ថានកាលពីថ្ងៃអង្គារ ជាសកម្មភាពមួយដែលធ្វើឲ្យមានការរអាក់រអួលកាន់តែខ្លាំងថែមទៀតដល់សេដ្ឋកិច្ច ដែលបានរុញទម្លាក់ដល់កម្រិតនៃការដួលរលំដោយសារតែការដកការគាំទ្រពីអន្តរជាតិភ្លាមៗ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
