យន្តហោះដឹកអ្នកដំណើរមួយគ្រឿងផ្សេងទៀតរបស់ក្រុមហ៊ុន Jeju Air ដែលបានចាកចេញពីអាកាសយានដ្ឋាន Gimpo ក្នុងទីក្រុងសេអ៊ូល ទៅកាន់កោះ Jeju របស់កូរ៉េខាងត្បូង នៅថ្ងៃចន្ទ (៣០ ធ្នូ) នេះ បានជួបប្រទះបញ្ហាដែលមិនទាន់កំណត់បានលើឧបករណ៍ចុះចត បន្ទាប់ពីហោះឡើង ហើយបានត្រឡប់ទៅអាកាសយានដ្ឋាន Gimpo វិញ និងបានចុះចតដោយសុវត្ថិភាព នេះបើតាមសារព័ត៌មាន Yonhap បានរាយការណ៍ដោយសម្អាងដល់ប្រភពដែលសុំមិនបញ្ចេញឈ្មោះ។

ប្រភពឧស្សាហកម្មនោះបានប្រាប់កាសែត Yonhap ថា យន្តហោះ Jeju Air ជើងហោះហើរ 7C101 ដែលមានអ្នកដំណើរ ១៦១នាក់ បានចាកចេញពីអាកាសយានដ្ឋានអន្តរជាតិ Gimpo នៅម៉ោង ៦:៣៧នាទីព្រឹក (ម៉ោងក្នុងស្រុក) មានទិសដៅទៅកាន់កោះ Jeju ហើយយន្តហោះបានត្រឡប់ទៅព្រលានវិញនៅម៉ោង ៧:២៥នាទីព្រឹក ដោយសារបញ្ហាមេកានិច ដែលបណ្តាលមកពីម៉ាស៊ីនចុះចត។

អ្នកដំណើរ និងបុគ្គលិកទាំងអស់មានសុវត្ថិភាព ហើយក្រុមបច្ចេកទេសកំពុង ពិនិត្យមើល និងកំណត់បញ្ហាដែលកើតឡើងនោះ ដើម្បីធានាសុវត្ថិភាព និងទំនុកចិត្តអ្នកដំណើរ។

ក្រុមហ៊ុនអាកាសចរណ៍ដែលមានតម្លៃសំបុត្រសមរម្យមួយនេះ បានប្រើប្រាស់យន្តហោះ Boeing 737-800 នៅលើផ្លូវហោះហើរនោះ ហើយនេះគឺជាគំរូដូចគ្នានឹងយន្តហោះដែលពាក់ព័ន្ធនឹងគ្រោះមហន្តរាយកាលពីថ្ងៃអាទិត្យ ដែលបានសម្លាប់មនុស្ស ១៧៩នាក់៕