រដ្ឋមន្ត្រីការបរទេសរុស្ស៊ី លោក សឺហ្គេ ឡាវរ៉ូវ (Sergei Lavrov) បានថ្លែងក្នុងបទសម្ភាសន៍មួយជាមួយសារព័ត៌មាន Novosti កាលពីថ្ងៃអាទិត្យថា រុស្ស៊ីបើកចំហចំពោះការចរចា ដើម្បីដោះស្រាយជម្លោះអ៊ុយ   ក្រែន ប៉ុន្តែកិច្ចពិភាក្សាបែបនេះ ត្រូវតែដោះស្រាយ «មូលហេតុឫសគល់»របស់ខ្លួន និងឆ្លុះបញ្ចាំងពីការពិតជាក់ស្តែង»។

លោក ឡាវរ៉ូវ បាននិយាយថា៖«យើងត្រៀមខ្លួនរួចជាស្រេចសម្រាប់ការចរចា ប៉ុន្តែពួកគេ ត្រូវតែមានគោលបំណងដោះស្រាយបញ្ហាឫសគល់នៃវិបត្តិអ៊ុយក្រែន និងគិតគូរពីស្ថានភាពពិតជាក់ស្តែង»។

លោក ឡាវរ៉ូវ បានបញ្ជាក់ពីតម្រូវការក្នុងការធានានូវ «ស្ថានភាពមិនចូលបក្សសម្ព័ន្ធ អព្យាក្រឹត និងឋានៈមិនមែននុយក្លេអ៊ែរ»របស់អ៊ុយក្រែន ដើម្បី «បញ្ចប់ការគំរាមកំហែងរយៈពេលវែងចំពោះសន្តិសុខរបស់   រុស្ស៊ី ដែលបង្កឡើងដោយលោកខាងលិច រួមទាំងការពង្រីកអង្គការណាតូ»។

លោកបានបន្ថែមថា៖ «ទីក្រុងគីវ ត្រូវតែប្រកាន់យកកាតព្វកិច្ចជាក់លាក់ ដើម្បីធានាសិទ្ធិ សេរីភាព និងផលប្រយោជន៍របស់ពលរដ្ឋ ដែលនិយាយភាសារុស្ស៊ី»។

សារព័ត៌មានក្នុងស្រុក Kyiv Independent បានរាយការណ៍ថា នៅក្នុងបទសម្ភាសន៍ជាមួយកាសែត Suspilne កាលពីថ្ងៃទី ១២ ខែធ្នូ ប្រធានការិយាល័យប្រធានាធិបតីអ៊ុយក្រែន លោក Andriy Yermak បាននិយាយថា អ៊ុយក្រែន មិនបានរៀបចំខ្លួន ដើម្បីចូលចរចាជាមួយរុស្ស៊ីទេ ដោយសារប្រទេសនេះ ខ្វះការគាំទ្រពីលោកខាងលិចគ្រប់គ្រាន់ ដើម្បីមានជំហររឹងមាំ ក្នុងការពិភាក្សា។