យន្តហោះដឹកអ្នកដំណើរដែលមានមនុស្ស ១៨១នាក់ នៅលើនោះ បានរអិលលើផ្លូវរត់ក្នុងល្បឿនដ៏លឿន ហើយបានជ្រុលទៅបុកជញ្ជាំង មុនពេលផ្ទុះឆេះជាអណ្ដាតភ្លើងយ៉ាងសន្ធោសន្ធៅ។ សមាជិកអាកាសយានិក ២នាក់ ត្រូវបានជួយសង្គ្រោះឲ្យរួចរស់ជីវិតពីកន្ទុយយន្តហោះដែលកំពុងឆេះ ប៉ុន្តែប៉ុន្មានម៉ោងក្រោយមកនៅថ្ងៃទី២៩ ខែធ្នូ ដំណឹងដ៏ក្រៀមក្រំបានផ្សព្វផ្សាយដល់សាច់ញាតិដែលកំពុងរង់ចាំយ៉ាងអន្ទះសារ នៅឯអាកាសយានដ្ឋានអន្តរជាតិ Muan ភាគនិរតីនៃប្រទេសកូរ៉េខាងត្បូង។

ល្ងាចថ្ងៃនោះ មនុស្ស ១៧៩នាក់ផ្សេងទៀត នៅលើយន្តហោះនោះ ត្រូវបានបញ្ជាក់ថា ស្លាប់ ដោយនាំឲ្យការធ្លាក់យន្តហោះដែលហោះហើរដោយក្រុមហ៊ុនអាកាសចរណ៍តម្លៃទាបដ៏ពេញនិយម Jeju Air ជាគ្រោះមហន្តរាយអាកាសចរណ៍ដ៏អាក្រក់បំផុត ពាក់ព័ន្ធនឹងក្រុមហ៊ុនអាកាសចរណ៍កូរ៉េខាងត្បូងជាលើកដំបូង ក្នុងរយៈពេលជិត ៣ទសវត្សរ៍មកនេះ និងអាក្រក់បំផុតមិនធ្លាប់មាន នៅលើដែនដីកូរ៉េខាងត្បូង។

ក្រុមមន្ត្រីកំពុងស៊ើបអង្កេតពីមូលហេតុដែលបណ្តាលឲ្យមានឧបទ្ទវហេតុយន្តហោះនេះ ដោយក្នុងនោះរួមទាំងមូលហេតុដែលឧបករណ៍ចុះចត ហាក់ដូចជាមានបញ្ហាផងដែរ និងថា តើយន្តហោះនេះ ត្រូវបានវាយប្រហារដោយសត្វស្លាបដែរ ឬយ៉ាងណា។ ខណៈដែលពាក្យចចាមអារ៉ាមអំពីមូលហេតុនៃគ្រោះថ្នាក់យន្តហោះនេះ បានលេចឡើង សមាជិកគ្រួសាររាប់រយនាក់នៃអ្នកដំណើរ បានស៊ូទ្រាំនឹងការរង់ចាំដ៏ឈឺចាប់ សម្រាប់ព័ត៌មានអំពីមនុស្សជាទីស្រលាញ់របស់ពួកគេវិលត្រលប់មកផ្ទះវិញពីដំណើរកម្សាន្តក្រៅប្រទេស។ សំឡេងយំស្រែក បានលាន់ឡើងពេញទាំងអាកាសយានដ្ឋាន Muan។ ស្ត្រីវ័យក្មេងម្នាក់ បានលួងលោមស្ត្រីចំណាស់ម្នាក់ដែលយំរៀបរាប់អំពីកូនប្រុសរបស់គាត់។ ស្ត្រី ២នាក់ផ្សេងទៀតកំពុងយំឱបគ្នា។ 

មន្ត្រីបាននិយាយថា គិតត្រឹមល្ងាចថ្ងៃទី២៩ ខែធ្នូ មានតែអ្នកស្លាប់ចំនួន ៦៥នាក់ប៉ុណ្ណោះដែលអាចកំណត់អត្តសញ្ញាណបានតាមរយៈស្នាមមេដៃ និងមធ្យោបាយផ្សេងៗទៀត។ សពរាប់សិបនាក់បានរងការខូចខាតយ៉ាងធ្ងន់ធ្ងរដែលមន្ត្រីមិនអាចកំណត់ភេទរបស់ជនរងគ្រោះបានភ្លាមៗ។ 

បុរសម្នាក់ឈ្មោះ Jang Gu-ho វ័យ ៦៨ឆ្នាំ បានអង្គុយយ៉ាងស្ងៀមស្ងាត់ នៅក្នុងសាលរង់ចាំអ្នកដំណើរមកដល់ក្បែរប្រពន្ធដែលកំពុងស្រក់ទឹកភ្នែក។ លោកបាននិយាយថា សាច់ញាតិរបស់លោក ៥នាក់ បានជិះយន្តហោះត្រលប់ពីវិស្សមកាលវិញ គឺប្អូនស្រីរបស់ភរិយាលោក កូនប្រសា និងចៅ ២នាក់៕