​បាល់ទាត់៖ ​ទីបំផុត​លោក Antonio Conte បាន​ក្លាយជា​អ្នកចាត់ការ​ក្លិប​អង់គ្លេស Tottenham Hotspur ផ្លូវការ​ហើយ​បន្ទាប់ពីបណ្តេញ​លោក Nuno Espirito Santo ចេញពី​តំណែង​បាន ២ថ្ងៃ​។ ​​អ្នកចាត់ការ​សញ្ជាតិ​អ៊ីតាលី​រូបនេះ​បាន​ចុះហត្ថលេខាដឹកនាំ​ក្លិប​នៅ​ទីក្រុង​ឡុង​ដ៍​មួយ​នេះ​ដល់​ខែមិថុនា​ ឆ្នាំ២០២៣​។​

​​ជាមួយគ្នា​នោះដែរ​បុរស​វ័យ ៥២ឆ្នាំ​រូបនេះ​ក៏បាន​ក្លាយជា​អ្នកចាត់ការ​ដែលមាន​ប្រាក់​ឈ្នួល​បំផុត​ម្នាក់​នៅ​ក្របខណ្ឌ English Premier League ផងដែរ​។​ ​​លោក Antonio Conte បាន​ចាក​ចេញពី Inter Milan ក្រោយ​ចប់​រដូវ​កាល​មុន​ បើទោះជា​បាន​ដឹកនាំ​ក្រុម​ឈ្នះ​ជើងឯក​អ៊ីតាលី Serie A ក៏ដោយ​។ ​​Antonio Conte ក៏​ធ្លាប់​ត្រូវបាន Spurs ទាក់​ផងដែរ​កាលពី​ខែមិថុនា​កន្លងទៅ​តែ​មិន​ត្រូវរ៉ូវ​គ្នា​រឿង​ប្រាក់ខែ​ហើយ Spurs គ្មាន​ជំរើស​ក៏​តែងតាំង​អតីត​គ្រូ Wolves លោក Nuno Espirito Santo​។ ​​ក្រោម​ការដឹកនាំ​របស់​បុរស​សញ្ជាតិ​ព័រទុយហ្កាល់​រូបនេះ​រយៈពេល ៤ខែ Spurs បាន​រង​បរាជ័យ ៥លើក​ក្នុងចំណោម ៧ប្រកួត​ចុងក្រោយ​ធ្លាក់ខ្លួន​ដល់​លេខ ៨ ក្នុង​តារាង​តាម​ពីក្រោយ​ក្រុម​កំពូល​តារាង Chelsea ១០ពិន្ទុ​។​

​​បរាជ័យ​របស់ Spurs ចុងក្រោយ​បំផុត​គឺ​ចាញ់​បិសាច​ក្រហម Manchester United ៣-០ ក្នុង​ទឹកដី​ខ្លួនឯង​កាលពី​ថ្ងៃ​សៅរ៍ ហើយ​សរុប​ស្ថិតិ​ដឹកនាំ​របស់​អ្នកចាត់ការ​សញ្ជាតិ​ព័រទុយហ្កាល់​រូបនេះ​រួមមាន​ឈ្នះ ៨ប្រកួត ស្មើ២ និង​ចាញ់ ៧ប្រកួត​។​ ​​រំលឹកថា​ លោក Antonio Conte ធ្លាប់​ដឹកនាំ​នៅ​អង់គ្លេស​ពី​ឆ្នាំ២០១៤-១៦ ជួយ Chelsea លើក​ពាន English Premier League និង FA Cup មុន​ត្រូវបាន​បណ្តេញចេញ​កាលពី​ខែកក្កដា ​ឆ្នាំ២០១៨៕

​អត្ថបទ​៖​នាង សុភា​វុ​ធ