រដ្ឋមន្ត្រីការបរទេសរុស្ស៊ី លោក Sergei Lavrov កាលពីថ្ងៃអាទិត្យ (ទី២៩ ខែធ្នូ) បាននិយាយថា ប្រទេសរុស្ស៊ី នឹងលុបចោលការហាមឃាត់ការដាក់ពង្រាយមីស៊ីលដែលមានសមត្ថភាពបំពាក់នុយក្លេអ៊ែររយៈចម្ងាយមធ្យម និងខ្លី ដោយសារតែសហរដ្ឋអាមេរិក បានដាក់ពង្រាយអាវុធបែបនេះ នៅក្នុងតំបន់ផ្សេងៗ ជុំវិញពិភពលោក។

ចំណាត់ការរបស់រុស្សីនេះដែលត្រូវបានបង្ហាញយូរយារណាស់មកហើយនោះ នឹងបញ្ជប់នូវអ្វីៗដែលនៅសេសសល់ពីសន្ធិសញ្ញាគ្រប់គ្រងអាវុធដ៏សំខាន់បំផុតមួយនៃសម័យសង្គ្រាមត្រជាក់ ចំពេលមានការព្រួយបារម្ភថា មហាអំណាចនុយក្លេអ៊ែរដ៏ធំបំផុតទាំង២ របស់ពិភពលោក អាចនឹងឈានចូលការប្រណាំងប្រជែងអាវុធថ្មី រួមជាមួយប្រទេសចិន។

រុស្ស៊ី និងអាមេរិក ដែលប្រទេសទាំង២ បានទទួលស្គាល់ថា ទំនាក់ទំនងរបស់ពួកគេ មានសភាពកាន់តែអាក្រក់ជាងពេលណាៗទាំងអស់ ចាប់តាំងពីសម័យសង្គ្រាមត្រជាក់ បានសម្តែងការសោកស្តាយ ចំពោះការបែកបាក់នៃសន្ធិសញ្ញាគ្រប់គ្រងអាវុធនេះ ដែលស្វះស្វែងរកការសម្រាលការប្រកួតប្រជែងអាវុធ និងកាត់បន្ថយហានិភ័យពីការមានសង្គ្រាមនុយក្លេអ៊ែរ។

នៅពេលត្រូវបានសួរដោយទីភ្នាក់ងារសារព័ត៌មានរដ្ឋ RIA ថា តើរុស្ស៊ីអាចដកខ្លួនចេញពីសន្ធិសញ្ញា New Start មុនពេលផុតកំណត់ នៅខែកុម្ភៈ ឆ្នាំ២០២៦ ដែរ ឬទេ លោក Lavrov បានឆ្លើយថា បច្ចុប្បន្ន មិនមានលក្ខខណ្ឌសម្រាប់កិច្ចសន្ទនាជាយុទ្ធសាស្ត្រជាមួយទីក្រុងវ៉ាស៊ីនតោនទៀតទេ។

លោកបានបញ្ជាក់ថា៖ «សព្វថ្ងៃនេះ វាគឺច្បាស់ណាស់ថា ការផ្អាករបស់យើងលើការដាក់ពង្រាយមីស៊ីលរយៈចម្ងាយខ្លី និងមធ្យម គឺមិនអាចអនុវត្តបានទៀតទេ ហើយនឹងត្រូវបោះបង់ចោល។ សហរដ្ឋអាមេរិកបានព្រងើយកន្តើយនឹងការព្រមានរបស់រុស្ស៊ី និងចិនយ៉ាងក្រអឺតក្រទម ហើយការអនុវត្តបានបន្ត ក្នុងការដាក់ពង្រាយអាវុធប្រភេទនេះ នៅក្នុងតំបន់ផ្សេងៗលើពិភពលោក»៕