សៀមរាប ៖ ក្រុមអ្នកជំនាញ បានបង្ហាញពីកំបោរបាយអមានតួនាទីសំខាន់ណាស់ក្នុងការកសាង និងជួសជុលប្រាសាទដែលធ្វើឡើងពីឥដ្ឋ ព្រោះវាបានបំពេញផ្សាភ្ជាប់ស្នាមតំណ ស្នាមប្រេះ​របស់​ដុំឥដ្ឋទាំងឡាយឱ្យស្អិតជាប់គ្នា ជួយការពារការជ្រាបទឹក។

អ្នកស្រី សៀង ម៉ាលីណែត ជាអ្នកជួសជុលប្រាសាទបុរាណរយៈពេល ២០ឆ្នាំហើយ អ្នក​ស្រីមាន​ប្រសាសន៍ថា បច្ចុប្បន្ននេះ ការជួសជុលប្រាសាទបុរាណដែលធ្វើពីឥដ្ឋឡើងវិញ ក៏នៅ​តែ​ត្រូវ​ការ​កំបោរបាយអជាចាំបាច់ ​ព្រោះសារធាតុផ្សុំវាជួយឱ្យឥដ្ឋប្រាសាទមានភាពរឹងមាំ ​និងបំបាត់ជ្រាបទឹក ជាពិសេសអ្នកជំនាញអាចយកវាទៅបិទតភ្ជាប់ដុំឥដ្ឋកុំឱ្យមានបែកប្រះស្រាំ។

អ្នកស្រីបន្ដថា កូនខ្មែរជំនាន់នេះ ​បានចេះផ្សំសារធាតុផ្សេងៗ​ធ្វើជាកំបោរបាយអ ដើម្បីបន្តវេន​ពី​បុព្វ​បុរសខ្មែរ​ជំនាន់​មុនដែរ។

អ្នកស្រីបន្ដថា រូបគាត់ជាអ្នកជំនាញស្ត្រីម្នាក់ក្នុងចំណោមអ្នកជំនាញស្ត្រីជាច្រើនរូបទៀត ដែលចេះ​ជំនាញ​ផ្សំធាតុលាយបាយអសម្រាប់ជួសជុលប្រាសាទដែលធ្វើពីឥដ្ឋនេះ ដែលជំនាញគឺចេះ​ពីជីតា​របស់​គាត់ និងបានបណ្តុះបណ្តាល​ពីអាជ្ញាធរជាតិអប្សរាផងដែរ។

អ្នកស្រីបង្ហាញចំណាប់អារម្មណ៍ថា ​គាត់ស្រឡាញ់ជំនាញផ្សំសារធាតុ និងការលាយ​បាយ​អ​ តាម​រូបមន្ត​បុរាណខ្មែរនេះ​ខ្លាំងណាស់ ហើយគាត់ចង់បន្តបង្រៀន​ជំនាញនេះ​ទៅឱ្យកូនខ្មែរជំនាន់ក្រោយ ដើម្បីកុំឱ្យបាត់បង់កេរ្តិ៍ដំណែលដ៏វិសេសមួយនេះ។

សារធាតុសំខាន់ៗ ដែលអាចយកមកផ្សំធ្វើជាបាយអបាន បច្ចុប្បន្ននេះ គឺងាយរកបំផុតនៅតាមផ្ទះ ដូចជា ​កំបោរធ្វើពីសំបកលៀស កំទេចឥដ្ឋ ​ដីខ្សាច់ ​ស្ករត្នោត ​ធ្យូង​ និង​កាវស្បែកគោជាដើម៕