ទាំងប្រមុខសន្តិសុខ និងចារកម្មអាល្លឺម៉ង់ នៅថ្ងៃចន្ទ (ទី៣០ ខែធ្នូ) នេះ គ្រោងនឹងប្រឈមជាមួយការសាកសួរ អំពីហេតុការណ៍វាយប្រហារដោយរថយន្តដែលបានសម្លាប់មនុស្ស ៥នាក់ និងបង្កឲ្យមានរបួសជាង ២០០នាក់ នៅឯផ្សារបុណ្យណូអែល កាលពី១០ ថ្ងៃមុន។

ពួកគេនឹងត្រូវបានសាកសួរ អំពីតម្រុយដែលអាចមើលរំលង និងការធ្វេសប្រហែសផ្នែកសន្តិសុខ មុនពេលមានការវាយប្រហារកាលពីថ្ងៃទី២០ ខែធ្នូ នៅភាគខាងកើតទីក្រុង Magdeburg ជាកន្លែងដែលនគរបាលបានចាប់ខ្លួនគ្រូពេទ្យផ្នែកវិកលចរិតជនជាតិអារ៉ាប៊ីសាអ៊ូឌីត ឈ្មោះ Taleb al-Abdulmohsen វ័យ ៥០ឆ្នាំ នៅកន្លែងកើតហេតុ។

រដ្ឋមន្ត្រីក្រសួងមហាផ្ទៃអាល្លឺម៉ង់ លោក Nancy Faeser មន្ត្រីប្រចាំរដ្ឋ Saxony-Anhalt និងប្រធានសេវាស៊ើបការណ៍សម្ងាត់ ក្នុងស្រុក និងបរទេសរបស់ប្រទេសអាល្លឺម៉ង់ ត្រូវបានគេរំពឹងថា នឹងប្រឈមជាមួយសវនាការគណៈកម្មាធិការ ដោយបិទទ្វារ នៅក្នុងសភា ចាប់ពីថ្ងៃត្រង់ម៉ោង តាមពេលវេលាម៉ោងសកល។

គួរបញ្ជាក់ថា លោក Taleb គឺជាជនសង្ស័យតែម្នាក់គត់ នៅក្នុងការវាយប្រហារ ដែលរថយន្តជួលប្រភេទរថយន្តស្ព័រ BMW ១គ្រឿង បានបើកបុកហ្វូងមនុស្សដើរកម្សាន្ត ក្នុងល្បឿនដ៏លឿន ដោយបន្សល់ទុកនូវស្នាមនៃការសម្លាប់យ៉ាងបង្ហូរឈាម។

ក្រុមអ្នកស៊ើបអង្កេតមិនទាន់បានប្រកាសនៅឡើយទេ អំពីមូលហេតុដែលត្រូវបានសង្ស័យ ជុំវិញបច្ច័យជំរុញចិត្ត ដែលនាំឲ្យមានវាយប្រហារ ដោយប្រើប្រាស់រថយន្តជាអាវុធនេះ ខណៈហេតុការណ៍នេះបានរំលឹកឡើងវិញនូវការវាយប្រហាររបស់ពួកជីហាដ កាលពីអតីតកាល ក្នុងនោះរួមទាំងការវាយប្រហារនៅទីក្រុងប៊ែរឡាំង និងនៅទីក្រុង Nice របស់បារាំង ក្នុងឆ្នាំ២០១៦ ផងដែរ៕