ទីភ្នាក់ងារសារព័ត៌មានរដ្ឋស៊ីរី (SANA) បានរាយការណ៍ថា មេដឹកនាំជាក់ស្ដែង លោក Ahmed al-Sharaa របស់ប្រទេសស៊ីរី នៅថ្ងៃចន្ទ (ទី៣០ ខែធ្នូ) នេះ បានជួបពិភាក្សាជាមួយគណៈប្រតិភូជាន់ខ្ពស់អ៊ុយក្រែនដឹកនាំដោយរដ្ឋមន្ត្រីការបរទេស លោក Andrii Sybiha ខណៈដែលទីក្រុងគីវ ប្រឹងប្រែងឆ្ពោះទៅរកការកសាងទំនាក់ទំនងជាមួយថ្នាក់ដឹកនាំថ្មី នៅទីក្រុងដាម៉ាស។

សារព័ត៌មាន SANA មិនបានផ្តល់ព័ត៌មានលម្អិតភ្លាមៗឡើយ អំពីកិច្ចពិភាក្សារបស់ឥស្សរជនទាំងនោះ ដែលបានធ្វើឡើងក្នុងទីក្រុងដាម៉ាស ប៉ុន្តែប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃសុក្រសប្តាហ៍មុនថា ប្រទេសរបស់លោក បានបញ្ជូនជំនួយស្បៀងអាហារដំបូងទៅកាន់ប្រទេសស៊ីរី ដែលជាប្រពៃណី គឺជាសម្ព័ន្ធមិត្តជិតស្និទ្ធរបស់រុស្ស៊ី។

លោក Zelenskiy បានប្រាប់នាពេលនោះថា ម្សៅស្រូវសាលី ៥០០តោន បាន និងកំពុងធ្វើដំណើរទៅកាន់ប្រទេសស៊ីរីរួចហើយ ដែលជាផ្នែកមួយនៃគំនិតផ្តួចផ្តើមមនុស្សធម៌ឈ្មោះ «គ្រាប់ធញ្ញជាតិពីអ៊ុយក្រែន» របស់ទីក្រុងគីវ ពោលគឺជាកិច្ចសហប្រតិបត្តិការជាមួយកម្មវិធីស្បៀងអាហារពិភពលោករបស់អង្គការសហប្រជាជាតិ។

អ៊ុយក្រែន ដែលជាអ្នកផលិត និងអ្នកនាំចេញគ្រាប់ធញ្ញជាតិ និងគ្រាប់ពូជប្រេងរបស់ពិភពលោក បានប្រាប់ថា ខ្លួនចង់ស្តារទំនាក់ទំនងជាមួយស៊ីរី បន្ទាប់ពីប្រធានាធិបតី លោក Bashar al-Assad បានធ្លាក់ចេញពីអំណាច ហើយភៀសខ្លួនទៅរស់នៅនិរទេសខ្លួន ក្នុងប្រទេសរុស្ស៊ី។

អ៊ុយក្រែនដែលបានប្រយុទ្ធទប់ទល់នឹងការលុកលុយរបស់កងកម្លាំងរុស្ស៊ីអស់រយៈពេលជិត ៣ឆ្នាំ ជាប្រពៃណី នាំចេញស្រូវសាលី និងពោតទៅកាន់ប្រទេស នៅតំបន់មជ្ឈិមបូព៌ា ប៉ុន្តែមិនមែនទៅប្រទេសស៊ីរីឡើយ ដែលក្នុងសម័យរបស់លោក Assad នាំចូលអាហារពីរុស្ស៊ី៕