ប្រទេសចិនបានបង្ហាញគំរូរថភ្លើងល្បឿនលឿនពាណិជ្ជកម្មជំនាន់ក្រោយរបស់ខ្លួន ដោយមានល្បឿនសាកល្បង ៤៥០គីឡូម៉ែត្រ ក្នុង ១ម៉ោង ពោលគឺលឿនជាងល្បឿនរថភ្លើងបច្ចុប្បន្ន ដែលស្ថិតក្នុងចំណោមរថភ្លើងលឿនបំផុតរបស់ពិភពលោករួចហើយ។

ក្នុងសេចក្តីថ្លែងការណ៍មួយដែលបានចែករំលែកនៅលើគណនី WeChat ផ្លូវការរបស់ខ្លួន កាលពីថ្ងៃអាទិត្យ (ទី២៩ ខែធ្នូ) ក្រុមហ៊ុនអយស្ម័យយាន China State Railway Group បានណែនាំបង្ហាញនូវរថភ្លើងល្បឿនលឿន CR450 ដែលមានល្បឿនប្រតិបត្តិការពាណិជ្ជកម្មអតិបរមា ៤០០គីឡូម៉ែត្រ ក្នុង ១ម៉ោង។

ក្រុមហ៊ុន China Railway បានឲ្យដឹងថា «ការបង្ហាញខ្លួនជាផ្លូវការនៃរថភ្លើងល្បឿនលឿនបំផុតរបស់ពិភពលោក គឺជារបកគំហើញដ៏សំខាន់ នៅក្នុងគម្រោង CR450 ដែលបានចាប់ផ្តើមក្នុងឆ្នាំ២០១៨» ហើយនឹង «ពង្រឹង និងពង្រីកបន្ថែមទៀត» នូវមហិច្ឆតារថភ្លើងល្បឿនលឿនជាសកលរបស់ប្រទេសចិន។

គួរបញ្ជាក់ថា ចិន គឺជាប្រទេសមួយ ក្នុងចំណោមប្រទេស នៅលើពិភពលោក ដែលមានរថភ្លើងល្បឿនលឿនពាណិជ្ជកម្មមួយចំនួនរួចហើយ។ រថភ្លើងល្បឿនលឿនសៀងហៃ (Shanghai Maglev) ដែលតភ្ជាប់អាកាសយានដ្ឋានអន្តរជាតិ Pudong របស់ទីក្រុងសៀងហៃទៅកាន់ទីក្រុងរដ្ឋបាលសៀងហៃ ដំណើរការក្នុងល្បឿនអតិបរមា ៤៣០គីឡូម៉ែត្រ ក្នុង ១ម៉ោង ដែលធ្វើឲ្យវាក្លាយជាសេវាកម្មរថភ្លើងពាណិជ្ជកម្មលឿនបំផុតលើពិភពលោក៕