​មីយ៉ាន់ម៉ា៖ ប្រមុខ​របប​យោធា​លោក Min Aung Hlaing បាន​បញ្ជាក់​ថា​ ស្រប​ពេល​ប្រឈម​នឹង​បញ្ហា​នយោបាយ ប្រជាជន​មី​យ៉ាន់​ម៉ា​ត្រូវតែ​ពឹងផ្អែក​លើ​ខ្លួនឯង ព្រោះថា​ប្រទេសជាតិ​នឹង​មាន​ការ​រីក​ចម្រើន និង​មាន​ស្ថិរភាព លុះ​ត្រា​តែ​មាន​កិច្ច​សហប្រតិបត្តិការ។​ ​មេដឹកនាំ​រដ្ឋប្រហារ​រូប​នេះ​បាន​និយាយ​នៅ​លើ​ទូរទស្សន៍​រដ្ឋ MRTV កាលពី​ថ្ងៃ​ចន្ទដើម​សប្ដាហ៍​នេះ​ថា ដើម្បី​ប្រារព្ធ​ខួប​រយៈពេល​ ៩​ខែ​នៃ​ការ​ទម្លាក់​រដ្ឋាភិបាល​ស៊ីវិល​ដឹកនាំ​ដោយ​លោកស្រី Aung San Suu Kyi ក្នុង​រឿង​នយោបាយ យើង​កំពុង​ប្រឈម​នឹង​ការរិះគន់ និង​ការ​រឹត​បន្តឹង​ផ្សេងៗ​។

​លោក​បាន​ថ្លែង​ថា ឥឡូវនេះ​ជា​ពេល​ដែល​ប្រជាពលរដ្ឋ​យើង​ត្រូវតែ​រួមគ្នា​ដើម្បី​ធានា​ដល់​ការ​អភិវឌ្ឍ និង​ស្ថិរភាព​ប្រទេស។ ​អាស៊ាន​បាន​ដក​ឧត្ដមសេនីយ៍​ជាន់ខ្ពស់​របស់​សហភាព​មី​យ៉ាន់​ម៉ា​ ចេញពី​កិច្ចប្រជុំ​កំពូល​ថ្នាក់​តំបន់​កាលពី​សប្ដាហ៍​មុន ​បន្ទាប់ពី​រដ្ឋាភិបាល​យោធា​មិន​អនុញ្ញាត​ឱ្យ​បេសកជន​ពិសេស​របស់​ប្លុក​នេះ ​ជួប​ជាមួយ​មេដឹកនាំ​ដែល​ត្រូវ​របប​សឹក​បណ្ដេញ​ចេញពី​តំណែង​ រួមមាន​លោកស្រី Suu Kyi ស៊ូ​ជី និង​អតីត​ប្រធានាធិបតី Win Myint​។​ ​ចំណាត់​ការ​ដ៏​កម្រ​នេះ​បាន​កើត​ឡើង ខណៈ​ដែល​ប្លុក​នេះ​ចាត់​ទុក​របប​នេះ​ថា ​ពុំបាន​ចាត់វិធានការ​គ្រប់គ្រាន់​ដើម្បី​បញ្ចប់​អំពើ​ហិង្សា​បន្ទាប់ពី​រដ្ឋប្រហារ​។​

​នៅ​ក្នុង​កិច្ចប្រជុំ​ថ្នាក់​តំបន់​កាលពី​សប្ដាហ៍​មុន មេដឹកនាំ​ពិភពលោក​រួម​ទាំង​ប្រធានាធិបតី​សហរដ្ឋអាមេរិក​លោក Joe Biden បាន​សម្ដែង​ការ​ព្រួយបារម្ភ​អំពី​ស្ថានភាព​នៅ​ក្នុង​សហភាព​មី​យ៉ាន់​ម៉ា ហើយ​បាន​អំពាវនាវ​ឱ្យ​របប​យោធា​បំពេញ​ការ​ប្តេជ្ញាចិត្ត​រប​ស់​ខ្លួន ​ចំពោះ​កិច្ចព្រមព្រៀង​កូ​សង់​ស៊ី​ស ​៥​ចំណុច​នៃ​កិច្ចប្រជុំ​មេដឹកនាំ​អាស៊ាន​កាលពី​ក្នុង​ខែ​មេសា​កន្លងទៅ​៕

អត្ថបទ៖ សុខមាន