នៅថ្ងៃចន្ទនេះ អ្នកដំណើរក្នុងអាកាសយានដ្ឋានក្រុងសេអ៊ូល បានបង្ហាញក្តីបារម្ភរបស់ពួកគេចំពោះការធ្វើដំណើរតាមអាកាស បន្ទាប់ពីការធ្លាក់យន្តហោះក្រុមហ៊ុនអាកាសចរណ៍ Jeju ដែលបណ្តាលឲ្យអ្នកដំណើរ ១៧៥នាក់ និងអាកាសយានិក ៤នាក់ស្លាប់ កាលពីរយៈពេល ១ថ្ងៃមុននេះ ។

គួរឲ្យដឹងថា យន្តហោះ Boeing 737-800 របស់ក្រុមហ៊ុនអាកាសចរណ៍ Jeju ធ្លាក់ ពេលចុះចតលោតផុតផ្លូវរត់នៅក្នុងអាកាសយានដ្ឋាន Muan ផ្ទុះជាអណ្តាតភ្លើងឡើង ពេលវាបុកជញ្ជាំង ។

 លោក Oh Ji-eun គឺជាពលរដ្ឋកូរ៉េខាងត្បូងមួយរូបដែលធ្វើដំណើរទៅកាន់ផ្ទះរបស់លោកលោកកោះ Jeju ពីទីក្រុងសេអ៊ូល និយាយថា តាមធម្មតាខ្ញុំមិនព្រួយបារម្ភនោះទេ ពេលឡើងជិះជើងហោះហើរ ប៉ុន្តែនៅថ្ងៃនេះ ខ្ញុំមានអារម្មណ៍ភិតភ័យបន្តិចដែរ ។ 

 លោកបន្តថា គ្រួសាររបស់លោកនៅកោះ Jeju មានការព្រួយបារម្ភខ្លាំងផងដែរ ដូច្នេះហើយវាធ្វើឲ្យខ្ញុំមានអារម្មណ៍មិនស្រួលចិត្តទាល់តែសោះ ។

 ខណៈពេលនោះដែរ ជើងហោះហើរមួយវ៉ុលទៀតរបស់ក្រុមហ៊ុនអាកាសចរណ៍ Jeju ដែលបានហោះចេញពីទីក្រុងសេអ៊ូលនៅថ្ងៃចន្ទនេះ បានវិលត្រឡប់មកកាន់អាកាសយានដ្ឋានវិញភ្លាមៗ ក្រោយហោះហើរ ដោយសារបញ្ហាកង់ចុះចតដូចគ្នា ដែលត្រូវបានរកឃើញនៅក្នុងម៉ូដែលយន្តហោះតែមួយ គឺយន្តហោះ Boeing B737-800ដែលបានធ្លាក់កាលពីថ្ងៃអាទិត្យម្សិលមិញ នៅអាកាសយានដ្ឋានអន្តរជាតិ Muan ៕