រដ្ឋមន្ត្រីថាមពលទួរគី លោក Alparslan Bayraktar បាននិយាយថា ប្រទេសទួរគីបានត្រៀមខ្លួនរួចជាស្រេច ក្នុងការផ្គត់ផ្គង់អគ្គិសនីដល់ប្រទេសស៊ីរី និងលីបង់ ហើយក្រុមមន្ត្រីរដ្ឋាភិបាលមួយក្រុម បានស្ថិតនៅស៊ីរីរួចហើយ ដើម្បីធ្វើការពីរបៀបដោះស្រាយបញ្ហាថាមពលរបស់ប្រទេសនេះ។

ទួរគីដែលគាំទ្រពួកឧទ្ទាមនៅក្នុងប្រទេសជិតខាងស៊ីរី ដែលបានផ្តួលរំលំរបបរបស់លោក Bashar al-Assad ក្នុងខែនេះ បន្ទាប់ពីមានសង្គ្រាមស៊ីវិលរយៈពេល ១៣ឆ្នាំនោះ បានបើកស្ថានទូតរបស់ខ្លួនឡើងវិញនៅទីក្រុងដាម៉ាស ហើយបានសាងនូវទំនាក់ទំនងកម្រិតខ្ពស់រួចហើយ ជាមួយមេដឹកនាំជាក់ស្ដែងថ្មី លោក Ahmed al-Sharaa។

នៅឯភាគអាគ្នេយ៍ទីក្រុង Sanliurfa របស់ប្រទេសទួរគី លោក Bayraktar បានប្រាប់អ្នកសារព័ត៌មានថា៖ «ប្រហែលជាតម្រូវការអគ្គិសនីរបស់ស៊ីរី និងលីបង់ នឹងត្រូវបានបំពេញជាដំបូង ដោយការនាំចេញពីប្រទេសទួរគី ហើយជាការពិតណាស់ យើងអាចដឹងពីស្ថានភាពកាន់តែច្បាស់បន្ថែមទៀត បន្ទាប់ពីបានឃើញស្ថានភាពជាក់ស្ដែងនៅក្នុងបណ្តាញបញ្ជូន»។

យោងតាមការអត្ថាធិប្បាយពីមុនរបស់លោក Bayraktar បានឲ្យដឹងថា គណៈប្រតិភូរបស់ក្រសួង បានទៅដល់ទីក្រុងដាម៉ាសហើយ កាលពីថ្ងៃសៅរ៍ចុងសប្ដាហ៍កន្លងមក ហើយនឹងពិភាក្សាអំពីកិច្ចសហប្រតិបត្តិការថាមពលដែលអាចមាន ក្នុងនោះរួមទាំងការបញ្ជូនអគ្គិសនី ដើម្បីកាត់បន្ថយការខ្វះខាតថាមពលផងដែរ៕