ប្រធានាធិបតីសហរដ្ឋអាមេរិក លោក Joe Biden បានប្រកាសផ្តល់ជំនួយផ្នែកសន្តិសុខបន្ថែមចំនួន ២,៥ពាន់លានដុល្លារ សម្រាប់អ៊ុយក្រែន នៅថ្ងៃចន្ទ (ទី៣០ ខែធ្នូ) នេះ ខណៈដែលលោកប្រើប្រាស់សប្តាហ៍ចុងក្រោយរបស់លោក នៅក្នុងតំណែង ដោយការបង្កើនជំនួយយោធាដល់ទីក្រុងគីវ មុនពេលប្រធានាធិបតីជាប់ឆ្នោត លោក Donald Trump ឡើងកាន់អំណាច។

លោក Biden បាននិយាយនៅក្នុងសេចក្តីថ្លែងការណ៍ថា៖ «តាមទិសដៅរបស់ខ្ញុំ សហរដ្ឋអាមេរិកនឹងបន្តធ្វើការដោយឥតឈប់ឈរ ដើម្បីពង្រឹងជំហររបស់អ៊ុយក្រែន ក្នុងសង្រ្គាម សម្រាប់រយៈពេលនៅសល់នៃពេលវេលារបស់ខ្ញុំ នៅក្នុងតំណែង»។

សេចក្តីប្រកាសរបស់លោក Biden រួមមានជំនួយយោធាចំនួន ១,២៥ពាន់លានដុល្លារដែលយកពីឃ្លាំងស្តុករបស់សហរដ្ឋអាមេរិក និងកញ្ចប់គំនិតផ្ដួចផ្ដើមជំនួយសន្តិសុខអ៊ុយក្រែន (USAI) ចំនួន ១,២២ពាន់លានដុល្លារ ដែលជាកញ្ចប់ជំនួយចុងក្រោយរបស់ USAI នៃពេលវេលានៅសល់ក្នុងតំណែងរបស់លោក Biden។

គួរបញ្ជាក់ថា ការលុកលុយរបស់រុស្ស៊ីលើអ៊ុយក្រែន កំពុងខិតជិតដល់រយៈពេល ៣ឆ្នាំហើយ ហើយថ្មីៗនេះ រុស្ស៊ី បានប្រើប្រាស់កងទ័ពកូរ៉េខាងជើង ដើម្បីពង្រឹងទីតាំងប្រយុទ្ធរបស់ខ្លួន។

រយៈពេលជិត ៣ឆ្នាំ ក្នុងសង្រ្គាមនេះ ទីក្រុងវ៉ាស៊ីនតោន បានសន្យាផ្តល់ជំនួយសរុបចំនួន ១៧៥ពាន់លានដុល្លារ សម្រាប់អ៊ុយក្រែន ប៉ុន្តែវាមិនប្រាកដទេថា តើជំនួយនឹងបន្តក្នុងល្បឿននោះដែរ ឬអត់ ក្រោមការដឹកនាំរបស់លោក Trump ដែលត្រូវជំនួសតំណែងរបស់លោក Biden នៅថ្ងៃទី២០ ខែមករា។ លោក Trump បាននិយាយនៅមុននេះថា លោកចង់បញ្ចប់សង្រ្គាមនេះឲ្យបានឆាប់រហ័ស៕