ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃចន្ទ ទី៣០ ខែធ្នូ ថា ប្រទេសអ៊ុយក្រែន និងរុស្ស៊ី បានធ្វើការដោះដូរឈ្លើយសឹកសង្គ្រាមថ្មី ដោយទីក្រុងគីវ បាននាំយកអតីតឈ្លើយសឹកចំនួន ១៨៩ នាក់ ត្រឡប់មកប្រទេសវិញ។ លោគ Zelenskyy បានអរគុណដល់ប្រទេសអារ៉ាប់រួម និងដៃគូផ្សេងទៀត សម្រាប់ការសម្របសម្រួលការដោះដូរនេះ។

លោក Zelenskyy បាននិយាយនៅលើកម្មវិធីផ្ញើសារ Telegram ថា «ការវិលត្រឡប់នៃប្រជាជនរបស់យើងពីការដាក់ឃុំឃាំងរបស់រុស្ស៊ី គឺជាដំណឹងដ៏ល្អសម្រាប់យើងម្នាក់ៗ ក្រុមរបស់យើងបាននាំយកពលរដ្ឋអ៊ុយក្រែនចំនួន១៨៩នាក់ ត្រឡប់មកប្រទេសវិញ» ។

ក្រសួងការពារជាតិរុស្ស៊ី បានរាយការណ៍អំពីការដោះដូរឈ្លើយសឹកកាលពីថ្ងៃចន្ទ ដោយនិយាយថា ភាគីនីមួយៗបានដោះលែងឈ្លើយសឹកសង្គ្រាមចំនួន១៥០នាក់។ ប៉ុន្តែរហូតមកដល់ពេលនេះ នៅពុំទាន់មានការពន្យល់ភ្លាមៗសម្រាប់ភាពខុសគ្នានៃចំនួន ដែលត្រូវបានរាយការណ៍ នោះទេ។

លោក Zelenskyy បាននិយាយថា ពលរដ្ឋអ៊ុយក្រែនដែលវិលត្រឡប់មកវិញរួមមានទាហាន និងមន្ត្រី មកពីតំបន់សមរភូមិជួរមុខខុសៗគ្នា ហើយក៏មានជនស៊ីវិលពីរនាក់ដែលត្រូវបានចាប់ខ្លួននៅទីក្រុងកំពង់ផែ Mariupol ភាគខាងត្បូង ដែលកងទ័ពរុស្ស៊ីបានចាប់ខ្លួនកាលពីឆ្នាំ២០២២។

រូបភាពដែលចេញផ្សាយដោយ លោក Zelenskyy បានបង្ហាញទាហានរាប់សិបនាក់កំពុងអង្គុយក្នុងរថយន្តក្រុង ដែលពួកគេមួយចំនួនរុំដោយទង់ជាតិពណ៌ខៀវ និងលឿងរបស់ប្រទេសអ៊ុយក្រែន។

ភាគីទាំងពីរបានដោះដូរទាហានឈ្លើយសឹករាប់រយនាក់ ចាប់តាំងពីរុស្ស៊ី បានចាប់ផ្តើមការវាយលុកដោយយោធាទៅលើអ៊ុយក្រែនក្នុងខែកុម្ភៈ ឆ្នាំ២០២២ ជាផ្នែកមួយនៃកិច្ចសហប្រតិបត្តិការ។

លោក Zelenskyy បាននិយាយថា «យើងកំពុងធ្វើការដើម្បីឲ្យមានការដោះលែងមនុស្សគ្រប់គ្នាពីការជាប់ឃុំឃាំងរបស់រុស្ស៊ី។ នេះគឺជាគោលដៅរបស់យើង។ យើងមិនភ្លេចនរណាម្នាក់នោះទេ»។

អ៊ុយក្រែន បាននិយាយកាលពីថ្ងៃចន្ទថា ទីក្រុងមូស្គូ បានដោះលែងមនុស្សសរុបចំនួន៣.៩៥៦នាក់ ទាំងទាហាន និងជនស៊ីវិល នៅក្នុងកិច្ចព្រមព្រៀងជាមួយទីក្រុងគីវ ចាប់តាំងពីការចាប់ផ្តើមជម្លោះ។