កំពង់ឆ្នាំង៖ លោកជំទាវ កែ ចន្ទមុនី អ្នកតំណាងរាស្ត្រមណ្ឌលកំពង់ឆ្នាំង និងឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង នៅព្រឹកថ្ងៃទី៣១ ខែធ្នូ ឆ្នាំ២០២៤នេះ បានអញ្ជើញចុះជួបសួរសុខទុក្ខ និងពិនិត្យការរស់នៅរបស់ស្ត្រីមេម៉ាយគថ្លង់គ្មានទីពឹង និងស្ត្រីមេម៉ាយងងឹតភ្នែកគ្មានទីពឹង រស់នៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ដែលកំពុងជួបការលំបាកទាំងការរស់នៅ និងទីជម្រក។

 ដោយមើលឃើញពីការលំបាកក្នុងការរស់នៅ និងមានជីវភាពក្រីក្ររបស់ស្ត្រីមេម៉ាយពិការភ្នែក និងគថ្លង់ លោកជំទាវ កែ ចន្ទមុនី តំណាងរាស្ត្រមណ្ឌលកំពង់ឆ្នាំង ឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្តកំពង់ឆ្នាំង និងក្រុមការងារ បានចុះពិនិត្យ និងសួរសុខទុក្ខស្ត្រីមេម៉ាយទាំង២គ្រួសារ(ម្នាក់ជាស្ត្រីមេម៉ាយជរាពិការភ្នែកមើលមិនឃើញ រស់នៅតែម្នាក់ឯង អាយុ៧៨ឆ្នាំ និងម្នាក់ទៀតជាស្ត្រីមេម៉ាយគថ្លង់ អាយុ៧៣ឆ្នាំ រស់នៅជាមួយចៅតូចៗ៣នាក់) និងបានផ្តល់អំណោយមនុស្សធម៌មួយចំនួនដល់ពួកគាត់ផងដែរ ។ ទន្ទឹមនឹងនោះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ថានឹងផ្តល់ជូនគ្រួសារស្ត្រីមេម៉ាជរាគថ្លង់គ្មានទីពឹង រួមនិងចៅតូចៗចំនួន៣នាក់ ជាមួយអណ្តូងទឹកស្អាត១ និងការសាងសង់ផ្ទះថ្មីជូនគាត់ ដើម្បីអោយពួកគាត់មានទីជម្រកល្អរស់នៅ។

 លោកជំទាវតំណាងរាស្ត្របានបន្តថា៖ កន្លងមកសម្តេចតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា, សម្តេចធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវ ពេជ្រ ចន្ទមុនី ហ៊ុន ម៉ាណែត តែងតែមានក្តីនឹករលឹក និងគិតគូរពីជីវភាព និងស្ថានភាពរស់នៅរបស់បងប្អូនប្រជាពលរដ្ឋក្រីក្រទាំងអស់នៅគ្រប់ទីកន្លែង ហើយតាមរយៈក្រុមការងារថ្នាក់ខេត្តដែលបានចុះមកក្នុងថ្ងៃនេះ សម្តេច និងលោកជំទាវ បានផ្តាំផ្ញើនូវការសាកសួរសុខទុក្ខ ក្តីនឹករលឹក និងសារអប់រំថែទាំសុខភាពឱ្យបានល្អ ជាពិសេស ត្រូវពិសាទឹកដាំឆ្អិន រស់នៅមានអនាម័យ ដើម្បីជៀសផុតពីជំងឺនានា ៕ កាំង ហុងវាស្នា