នាយករដ្ឋមន្ត្រីបារាំង លោក François Bayrou បានចុះទៅពិនិត្យកោះ ម៉ាយ៉ត់ (Mayotte) កាលពីថ្ងៃចន្ទ (៣០ ធ្នូ) ដោយសន្យាថានឹងសាងសង់ទឹកដីក្រៅប្រទេសរបស់បារាំង ដែលបានបំផ្លិចបំផ្លាញដោយព្យុះស៊ីក្លូនមួយនេះឡើងវិញ ក្នុងពេលត្រឹមតែពីរឆ្នាំប៉ុណ្ណោះ។ ព្យុះស៊ីក្លូន ឈីដូ (Chido) ដ៏កាចសាហាវបំផុតក្នុងពេល ៩០ឆ្នាំ បានបំផ្លិចបំផ្លាញកោះនេះ បណ្តាលឱ្យមានការខូចខាត និងបាត់បង់អាយុជីវិតមនុស្សយ៉ាងច្រើន។

ក្នុងអំឡុងពេលដំណើររបស់ខ្លួនទៅកាន់មន្ទីរពេទ្យចល័តមួយ លោក Bayrou បាននិយាយថា "ពាក្យចចាមអារ៉ាមថាមានមនុស្សស្លាប់រាប់ពាន់នាក់នោះគឺគ្មានមូលដ្ឋានត្រឹមត្រូវទាល់តែសោះ" ដោយបំភ្លឺថា ចំនួនអ្នកស្លាប់ទំនងជា "រាប់រយនាក់ប៉ុណ្ណោះ"។

ការអត្ថាធិប្បាយនេះហាក់ដូចជាច្រានចោលការលើកឡើងរបស់អភិបាលតំបន់ Mayotte គឺលោក François-Xavier Bieuville ដែលបាននិយាយថា លោកគិតថាមានអ្នកស្លាប់ច្រើនរយនាក់ ឬអាច "រាប់ពាន់នាក់"។ លោក Bayrou ហាក់បង្ហើបថា នេះជាការប៉ាន់ស្មានមិនត្រឹមត្រូវទេ។

ចំនួនអ្នកស្លាប់ផ្លូវការចុងក្រោយបំផុត មាន ៣៩នាក់ នេះបើយោងតាមអាជ្ញាធរ។ ទោះជាយ៉ាងនេះក្ដី អ្នកស្រុកបានសម្តែងក្ដីបារម្ភ ដោយសារមិនដឹងថាតើសាច់ញាតិពួកគេបានស្លាប់ ឬបាត់ខ្លួន ឬយ៉ាងណាឡើយ ដោយសារតែការបញ្ចុះសពយ៉ាងប្រញាប់ប្រញាល់តាមទំនៀមទម្លាប់សាសនាអ៊ិស្លាម ដែលតម្រូវឱ្យកប់អ្នកស្លាប់ក្នុងពេល ២៤ម៉ោង ហើយហេតុផលផ្សេងទៀតដូចជាជនអន្តោប្រវេសន៍គ្មានឯកសារ ឬការបាត់ទំនាក់ទំនងជាដើម៕