វិស័យអាកាសចរណ៍ពាណិជ្ជកម្មបានទទួលរងគ្រោះដោយការស្លាប់ច្រើនបំផុតចាប់តាំងពីឆ្នាំ២០១៨មក បន្ទាប់ពីគ្រោះមហន្តរាយ Jeju Air កាលពីថ្ងៃទី២៩ ខែធ្នូ នៅកូរ៉េខាងត្បូង និងការធ្លាក់យន្តហោះអាស៊ែរបៃហ្សង់ កាលពីសប្តាហ៍មុន។

អ្នកស្លាប់នៅលើយន្តហោះដឹកអ្នកដំណើរបានកើនឡើងដល់ ៣១៨នាក់ ក្នុងឆ្នាំ២០២៤ ជាមួយនឹងគ្រោះថ្នាក់ធំៗថ្មីនេះចំនួនពីរលើក នេះបើតាមទិន្នន័យចងក្រងដោយទីភ្នាក់ងារតាមដានគ្រោះថ្នាក់ផ្លូវអាកាស Cirium។ នោះគឺជាចំនួនអ្នកស្លាប់ខ្ពស់បំផុតចាប់តាំងពីមនុស្សជាង ៥០០នាក់ បានស្លាប់នៅក្នុងឆ្នាំ២០១៨ ដោយការធ្លាក់យន្តហោះ Boeing 737 Max ដំបូងបង្អស់ចំនួនពីរលើក។

ឆ្នាំ២០២៤ នេះបានចាប់ផ្តើម និងបញ្ចប់ដោយសោកនាដកម្មនៅក្នុងឧប្បត្តិហេតុយន្តហោះនៅជប៉ុន ប្រេស៊ីល សិង្ហបុរី និងកូរ៉េខាងត្បូង អំឡុងពេលព្យាយាមចុះចត ក្នុងចំណោមដំណាក់កាលគ្រោះថ្នាក់បំផុតនៃការហោះហើរ។ ឧបទ្ទវហេតុអាកាសចរណ៍ធ្ងន់ធ្ងរនៅតែជារឿងកម្រ ហើយគ្រោះថ្នាក់ធំមួយអាចធ្វើឱ្យឆ្នាំដែលមានសុវត្ថិភាពគិតតាមស្ថិតិ ក្លាយទៅជាឆ្នាំដ៏អាក្រក់បំផុតមួយ។

កំណើនអ្នកស្លាប់លើយន្តហោះក្នុងឆ្នាំនេះគឺខុសពីឆ្នាំ២០២៣ ដែលបានក្លាយជាឆ្នាំដ៏សុវត្ថិភាពបំផុតមិនធ្លាប់មាននៅក្នុងផ្លូវអាកាសចរណ៍ ដោយមិនមានការស្លាប់នោះទេក្នុងចំណោមយន្តហោះដឹកអ្នកដំណើរធំៗ ដែលជាធម្មតាជាយន្តហោះផលិតដោយក្រុមហ៊ុន Airbus និង Boeing៕