ប្រជាជនកូរ៉េខាងត្បូងបានសម្តែងការយល់ព្រមលើដីកាចាប់ខ្លួនលោក Yoon Suk Yeol ប្រធានាធិបតីដែលត្រូវបានចោទប្រកាន់ទម្លាក់តំណែងនៅថ្ងៃអង្គារ៣១ ធ្នូនេះ ជុំវិញការសម្រេចចិត្តរបស់លោកក្នុងការដាក់ច្បាប់អាជ្ញាសឹកនៅក្នុងប្រទេសនេះកាលពីថ្ងៃទី ៣ ខែធ្នូ។

អ្នកខ្លះយល់ថាលោក Yoon គួរតែត្រូវបានគេចាប់ខ្លួនឆាប់ជាងនេះ។ លោក Choi Kwan-Ho ដែលជាអ្នករស់នៅទីក្រុងសេអ៊ូលមានវ័យ៦១ឆ្នាំបាននិយាយថា ទោះបីជាវាមានអារម្មណ៍យឺតយ៉ាវក៏ដោយ ខ្ញុំគិតថាដីកានេះក៏ល្អដែរ។

ជាការឆ្លើយតបទៅនឹងដីកាចាប់ខ្លួន មេធាវីរបស់លោក Yoon លោក Yoon Kab-kuen បាននិយាយនៅថ្ងៃអង្គារនេះថា ការប្រកាសច្បាប់អាជ្ញាសឹករបស់កូនក្ដីលោកមិនមែនជាការបះបោរទេ ហើយដីកានេះគឺមិនត្រឹមត្រូវទាល់តែសោះ។

គេមិនទាន់ដឹងច្បាស់ថា តើដីកាចាប់ខ្លួនលោក Yoon នឹងត្រូវអនុវត្តនៅពេលណា ឬរបៀបណានោះទេ។

សេវាសន្តិសុខប្រធានាធិបតីកូរ៉េខាងត្បូងបាននិយាយនៅក្នុងសេចក្តីថ្លែងការណ៍មួយនៅថ្ងៃអង្គារនេះថា ខ្លួននឹងចាត់ចែងដីកាចាប់ខ្លួននេះតាមដំណើរការសមស្រប។

ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ (CIO) បាននិយាយថា តុលាការក៏បានអនុម័តដីកាស្វែងរកសម្រាប់លំនៅដ្ឋានរបស់លោក Yoon ផងដែរ៕