សន្និសីទថ្នាក់ជាតិរបស់ប្រទេសស៊ីរី គ្រោងនឹងប្រព្រឹត្តិទៅនៅថ្ងៃទី៤ និងទី៥ ខែមករា ក្នុងទីក្រុង ដាម៉ាស (Damascus) ដើម្បីពិភាក្សាអំពីអនាគតរបស់ប្រទេសនេះ បន្ទាប់ពីការដួលរលំនៃរដ្ឋាភិបាលលោក លោកអាសាដ(Assad)។ នេះបើយោងតាមសេចក្តីរាយការណ៍ពីសារព័ត៌មាននានា កាលពីថ្ងៃចន្ទ។

ទូរទស្សន៍ទួរគី A Haber បានរាយការណ៍ថា សន្និសីទនេះ ត្រូវបានគេរំពឹងថា នឹងប្រកាសពីការរំលាយក្រុមប្រឆាំងប្រដាប់អាវុធទាំងអស់ រួមទាំងក្រុម Hayat Tahrir al-Sham ដែលដឹកនាំដោយលោក Ahmed al-Sharaa ដែលដើរតួយ៉ាងសំខាន់ ក្នុងការផ្តួលរំលំរដ្ឋាភិបាលរបស់លោក អាសាដ កាលពីថ្ងៃទី ០៨ ខែធ្នូ។

នេះនឹងជាសន្និសីទថ្នាក់ជាតិលើកដំបូង ចាប់តាំងពីមានការផ្លាស់ប្តូររបបដ៏តឹងរ៉ឹង ក្នុងប្រទេសអារ៉ាប់។ អ្នករៀបចំគ្រោង នឹងអញ្ជើញជនជាតិស៊ីរីប្រហែល ១.២00 នាក់ ទាំងក្នុង និងក្រៅប្រទេស ដោយមានអ្នកតំណាងបន្ថែមពី ៧០ ទៅ ១០០នាក់ មកពីខេត្តនីមួយៗ ដែលមានក្រុមការងារសង្គមជាច្រើន។ នេះបើយោងតាមរបាយការណ៍ប្រព័ន្ធផ្សព្វផ្សាយ។

សន្និសីទនេះ ក៏ត្រូវបានគេរំពឹងថា នឹងបង្កើតគណៈកម្មាធិការព្រាងរដ្ឋធម្មនុញ្ញ និងស្នើបង្កើតរដ្ឋាភិបាលថ្មីក្នុងរយៈពេលមួយខែ។ តំណាងមកពីក្រុមយុវជន អង្គការស្ត្រី បព្វជិត និងសង្គមស៊ីវិល ត្រូវគ្រោងឲ្យចូល   រួម។

សារព័ត៌មាន Al-Jazeera បានរាយការណ៍ថា គណៈកម្មាធិការរៀបចំ នឹងត្រូវបានបង្កើតឡើងសម្រាប់សន្និសីទជាតិ នាពេលខាងមុខនេះ។

រដ្ឋបាលបណ្តោះអាសន្នរបស់ស៊ីរី ដែលដឹកនាំដោយលោក al-Sharaa មិនបានចេញសេចក្តីថ្លែងការណ៍ផ្លូវការណាមួយទាក់ទងនឹងសន្និសីទនេះទេ។