អនុអធិការបតី លោក Robert Habeck បានលើកឡើងនៅក្នុងសុន្ទរកថាឆ្នាំថ្មីរបស់លោកថា ការគាំទ្ររបស់មហាសេដ្ឋីអាមេរិក លោក Elon Musk ចំពោះក្រុមស្តាំនិយមជ្រុលរបស់ប្រទេសអាល្លឺម៉ង់ គឺគណបក្សជម្រើសផ្សេងទៀត សម្រាប់អាល្លឺម៉ង់ (AfD) គឺជាការប្រើយុទ្ធសាស្ត្រ «សមហេតុផល និងជាប្រព័ន្ធ» ដើម្បីបាននូវតំបន់អឺរ៉ុបដ៏ទន់ខ្សោយមួយ ដែលនឹងមិនអាចការគ្រប់គ្រងខ្លាំងក្លា។

បេក្ខជនអធិការបតី សម្រាប់គណបក្ស Greens ក្នុងការបោះឆ្នោតជាតិអាល្លឺម៉ង់ ដែលនឹងត្រូវធ្វើឡើងនៅក្នុងខែកុម្ភៈ លោក Habeck បាននិយាយថា ការអំពាវនាវរបស់លោក Musk មិនមែនធ្វើឡើងដោយមិនដឹងអ្វីសោះនោះទេ។

លោក Habeck បានបន្ថែមថា៖ «នេះជាយុទ្ធសាស្ត្រសមហេតុផល និងជាប្រព័ន្ធ។ លោក Musk កំពុងជួយពង្រឹងអ្នកដែលកំពុងធ្វើឱ្យអឺរ៉ុបចុះខ្សោយ។ អឺរ៉ុបដ៏ទន់ខ្សោយមួយ ស្ថិតនៅក្នុងផលប្រយោជន៍របស់អ្នកដែលបទប្បញ្ញត្តិនានា គឺជាឧបសគ្គរារាំងដល់អំណាចមិនត្រឹមត្រូវរបស់ពួកគេ»។

គួររំលឹកថា រដ្ឋាភិបាលអាល្លឺម៉ង់ កាលពីថ្ងៃចន្ទ (ទី៣០ ខែធ្នូ) បានចោទប្រកាន់លោក Musk ដែលជាម្ចាស់បណ្ដាញសង្គម X និងជានាយកប្រតិបត្តិរបស់ក្រុមហ៊ុន Tesla និង SpaceX ថា បានព្យាយាមមានឥទ្ធិពលលើការបោះឆ្នោត នាពេលខាងមុខ តាមរយៈការផ្ដល់ទស្សនៈ នៅលើទំព័រសារព័ត៌មាន Welt am Sonntag៕