ប្រព័ន្ធការពារដែនអាកាសនៅក្នុងរដ្ឋធានីគីវ ប្រទេសអ៊ុយក្រែន បានរុញច្រានការវាយប្រហាររបស់រុស្ស៊ីនៅព្រឹកថ្ងៃអង្គារនេះ ។

សាក្សីរបស់ទីភ្នាក់ងារព័ត៌មានរ៉យទ័រ រាយការណ៍ពីការផ្ទុះជាច្រើននៅក្នុងរដ្ឋធានីគីវ ក្រោយកងទ័ពអាកាសអ៊ុយក្រែនប្រកាសការគំរាមកំហែងមីស៊ីលនៅទូទាំងប្រទេស ។

រដ្ឋបាលយោធាទីក្រុងគីវ និយាយនៅលើបណ្តាញព័ត៌មានសង្គម Telegramថា បំណែកមីស៊ីលបានធ្លាក់លើអគារឯកជនមួយខ្នងនៅទីក្រុងគីវ ប៉ុន្តែគ្មានការខូចខាត ការឆាបឆេះ ឬគ្រោះថ្នាក់នោះទេ ។

ដោយឡែក ហេដ្ឋារចនាសម្ព័ន្ធមួយចំនួន រងការវាយប្រហារពីមីស៊ីលរបស់រុស្ស៊ី ផងដែរនៅទីក្រុង Shostka ស្ថិតក្នុងតំបន់ភាគខាងជើង Sumy ។

ខណៈពេលនោះដែរ ប្រធានខុទ្ធការល័យប្រធានាធិបតីអ៊ុយក្រែន លោក Andriy Yermak និយាយថា អ៊ុយក្រែននឹងបន្តប្រយុទ្ធ ទោះបីជារដ្ឋបាលរបស់សហរដ្ឋអាមេរិក ដែលនឹងចូលកាន់តំណែងនៅពេលខាងមុខ ផ្អាកជំនួយក៏ដោយ ។

លោក Yermak បាននិយាយថា ពួកយើងនឹងបន្តប្រយុទ្ធ ហើយក៏ធ្វើការជាមួយរដ្ឋបាលថ្មីរបស់សហរដ្ឋអាមេរិកផងដែរ ។

លោកបានទទួលស្គាល់ពីហានិភ័យនៃការគាំទ្ររបស់សហរដ្ឋអាមេរិកដែលត្រូវបានកាត់បន្ថយ ហើយលោកបានធ្វើការសង្កត់ធ្ងន់ថា អ៊ុយក្រែននឹងពង្រឹងទំនាក់ទំនងរបស់ខ្លួនជាមួយសហភាពអឺរ៉ុប ប្រសិនបើការកាត់ជំនួយបែបនោះ កើតឡើង ៕