លោក Yahya Saree អ្នកនាំពាក្យយោធារបស់អង្គការនេះ បាននិយាយថា ក្រុមហ៊ួទីមកពីចលនាឧទ្ទាម Ansar Allah នៅប្រទេសយេម៉ែន បានវាយប្រហារលើនាវាផ្ទុកយន្តហោះ USS Harry S. Truman ដោយមីស៊ីល និងយានដ្រូន។

អ្នកនាំពាក្យរូបនេះ បាននិយាយនៅក្នុងសេចក្តីថ្លែងការណ៍មួយ ដែលបានចាក់ផ្សាយដោយទូរទស្សន៍ Al Masirah ថា៖«កងទ័ពជើងទឹករបស់ប្រទេសយេម៉ែន កងទ័ពរ៉ូកែត និងកងទ័ពប្រព័ន្ធគ្មានមនុស្សបើក បានធ្វើប្រតិបត្តិការរួមគ្នាមួយ ក្នុងអំឡុងពេលដែលនាវាផ្ទុកយន្តហោះ USS Harry S. Truman ត្រូវបានវាយប្រហារដោយយានដ្រូន និងមីស៊ីលជាច្រើនគ្រាប់»។

លោក Saree បានកត់សម្គាល់ឃើញថា កងកម្លាំងសហរដ្ឋអាមេរិក កំពុងរៀបចំ «ការវាយប្រហារទ្រង់ទ្រាយធំ» ប្រឆាំងនឹងទឹកដីរបស់ប្រទេសយេម៉ែន។ លោកបានបន្ថែមថា៖«ប្រតិបត្តិការនេះ បានឈានដល់គោលដៅរបស់ខ្លួនដោយជោគជ័យ ហើយការវាយប្រហារតាមអាកាសរបស់សហរដ្ឋអាមេរិកដែលត្រូវបានរៀបចំប្រឆាំងនឹងប្រទេសរបស់យើង ត្រូវបានរំខាន» ។