ទីក្រុងប៉េកាំង នៅថ្ងៃអង្គារ (ទី៣១ ខែធ្នូ) បានវាយបកវិញ ចំពោះការចោទប្រកាន់ថា តួអង្គដែលត្រូវបានគាំទ្រដោយរដ្ឋចិន នៅពីក្រោយការរំលោភចូលប្រព័ន្ធអ៊ីនធឺណិត នៅក្រសួងរតនាគារសហរដ្ឋអាមេរិកដោយចាត់ទុកការអះអាងនេះថា «គ្មានមូលដ្ឋានពិតប្រាកដ»។

យោងតាមលិខិតបញ្ជូនទៅសភា ដែលសារព័ត៌មាន AFP បានឃើញ បានបង្ហាញថា ក្រសួងរតនាគារបានប្រាប់ឲ្យដឹងថា ការវាយប្រហារនេះបាននាំឲ្យមានការចូលទៅកាន់ទិន្នន័យក្នុងកុំព្យួទ័រការងារមួយចំនួនរបស់ក្រសួង។

យោងតាមរតនាគារ បានឲ្យដឹងទៀតថា ហេតុការណ៍នេះបានកើតឡើងនៅដើមខែនេះ នៅពេលដែលតួអង្គ បានធ្វើឲ្យខូចក្រុមហ៊ុនផ្តល់សេវាសន្តិសុខតាមអ៊ីនធឺណិតភាគីទី៣ ហើយអាចចូលពីចម្ងាយទៅកាន់ទិន្នន័យកុំព្យួទ័រការងារ និងឯកសារសម្ងាត់មួយចំនួន។

តែយ៉ាងណាក្ដី ប្រទេសចិនបានបដិសេធការអះអាងនេះ ដោយក្រសួងការបរទេស បាននិយាយថា ទីក្រុងប៉េកាំង «តែងតែប្រឆាំងការវាយប្រហារគ្រប់ទម្រង់របស់ក្រុមចោរព័ត៌មានវិទ្យា ហើយយើងកាន់តែប្រឆាំងទៅនឹងការផ្សព្វផ្សាយព័ត៌មានមិនពិតពីប្រទេសចិន សម្រាប់គោលបំណងនយោបាយ»។

អ្នកនាំពាក្យក្រសួងការបរទេស លោកស្រី Mao Ning បាននិយាយថា៖ «យើងបានបញ្ជាក់ពីគោលជំហររបស់យើងជាច្រើនដងមកហើយ ទាក់ទងនឹងការចោទប្រកាន់គ្មានមូលដ្ឋានបែបនេះ ពោលគឺជាលើកឡើងដែលមិនមានភស្តុតាងបញ្ជាក់ឲ្យបានច្បាស់លាស់»៕