រដ្ឋមន្ត្រីកងកម្លាំងប្រដាប់អាវុធបារាំង លោក Sebastien Lecornu នៅថ្ងៃអង្គារ (ទី៣១ ខែធ្នូ) នេះ បាននិយាយថា ប្រទេសបារាំងបានធ្វើការវាយប្រហារដោយមីស៊ីល កាលពីចុងសប្តាហ៍កន្លងមក នៅក្នុងប្រទេសស៊ីរី ដោយដាក់គោលដៅលើទីតាំងរបស់ក្រុមរដ្ឋឥស្លាម (ISIS) នៅក្នុងប្រទេសនេះ។

លោក Lecornu បានសរសេរនៅលើវេទិកាបណ្ដាញសង្គម X ថា៖ «កាលពីថ្ងៃអាទិត្យ (ទី២៩ ខែធ្នូ) កងកម្លាំងដែនអាកាសរបស់បារាំង បានដាក់គោលដៅវាយប្រហារ លើទីតាំងនានារបស់ក្រុមរដ្ឋឥស្លាម ដែលមានមូលដ្ឋាននៅដែនដីស៊ីរី»។

គួរបញ្ជាក់ថា ការវាយប្រហារតាមអាកាសរបស់បារាំងនេះ បានធ្វើឡើងបន្ទាប់ពីមានការវាយប្រហារដោយយោធាស្រដៀងគ្នា ពីសំណាក់សហរដ្ឋអាមេរិក នៅស៊ីរី ដែលទីក្រុងវ៉ាស៊ីនតោន បានប្រាប់ឲ្យដឹងថា បានសម្លាប់ប្រតិបត្តិកររដ្ឋឥស្លាម ២នាក់។

ប្រទេសស៊ីរីប្រឈនឹងអនាគតនយោបាយមិនច្បាស់លាស់ បន្ទាប់ពីក្រុម Hayat Tahrir al-Sham (HTS) បានទម្លាក់ប្រធានាធិបតី លោក Bashar al-Assad ពីអំណាច កាលពីថ្ងៃទី៨ ខែធ្នូ។

យុទ្ធនាការដ៏លឿនរហ័សដូចផ្លេកបន្ទោរដែលដឹកនាំដោយក្រុម HTS បានបញ្ចប់សង្គ្រាមស៊ីវិលរយៈពេល ១៣ឆ្នាំ ប៉ុន្តែវាបានបន្សល់ទុកនូវសំណួរជាច្រើន អំពីអនាគតនៃប្រទេសពហុជាតិសាសន៍មួយនេះ ដែលរដ្ឋបរទេសជាច្រើន ក្នុងនោះរួមទាំងទួរគី និងរុស្ស៊ីផងដែរ មានឥទ្ធិពលលើយ៉ាងខ្លាំងក្លា ហើយអាចមានការប្រកួតប្រជែងដណ្ដើមផលប្រយោជន៍៕