ព្រឹត្តិការណ៍ «សាទរកម្ពុជា» បានក្លាយជាព្រឹត្តិការណ៍ដ៏ធំសម្រាប់ចុងឆ្នាំ២០២៤។ ព្រឹត្តិការណ៍​នេះ​បាន​ផ្ដល់ភាពសប្បាយរីករាយ ស្នាមញញឹមដល់ប្រជាពលរដ្ឋគ្រប់រូបតាំងពីថ្ងៃហាត់សម រហូត​ដល់​ថ្ងៃកម្មវិធី ដែលមានអ្នកចូលរួមទាំងចាស់ ទាំងក្មេង ទាំងអ្នករស់នៅរាជធានីភ្នំពេញ និង​អ្នក​មក​ពី​តាម​បណ្ដាខេត្តនានា។

ព្រឹត្តិការណ៍​សាទរកម្ពុជា ជាព្រឹត្តិការណ៍លើកដំបូងដែល សហភាពសហព័ន្ធយុវជនកម្ពុជា បាន​ផ្ដួច​ផ្ដើម​រៀបចំឡើង ដោយមានការចូលរួមពីយុវជនស្ម័គ្រចិត្តរាប់ពាន់ដែលមានគំនិតជារួម រៀប​ចំ​ឡើង​ដើម្បី​សង្គមជាតិកម្ពុជា។ ព្រឹត្តិការណ៍នេះ ចាប់រាប់ពីការហាត់សមជាច្រើនថ្ងៃ រហូត​មក​ដល់​ថ្ងៃ​កម្ម​វិធី គឺបានផ្ដល់ស្នាមញញឹម ភាពពេញចិត្ត សម្រាប់អ្នកចូលរួមគ្រប់រូប។ ជាក់ស្ដែងសម្រាប់ថ្ងៃទី ៣១ ខែធ្នូ ឆ្នាំ ២០២៤ ដែលជាថ្ងៃកម្មវិធីផ្ទាល់ ប្រជាពលរដ្ឋ​បាន​អញ្ជើញ​មក​ដល់​មុខព្រះបរមរាជវាំង តាំងពីពេលថ្ងៃត្រង់ ដើម្បីរង់ចាំទស្សនាការចាប់ផ្ដើមកម្មវិធីជាផ្លូវការ។ ពិសេស​គឺរង់ចាំក្បួនដង្ហែសាទរកម្ពុជាដ៏អស្ចារ្យ។

សម្រាប់ពលរដ្ឋដែលបានអញ្ជើញមករង់ចាំទស្សនានេះ មានវ័យមានចាស់ មានក្មេង ជាក្រុមគ្រួសារ ជាមិត្តភក្តិ ជាអ្នករស់នៅរាជធានីភ្នំពេញ និងមាន​អ្នក​មក​ពី​តាម​បណ្ដា​ខេត្ត​ផង​ដែរ​។ គួរឱ្យចាប់អារម្មណ៍ផងដែរ ដូនចាស់ វ័យចាប់ពី៨០ឆ្នាំឡើង ក៏ប្រឹង​ពុះពារ​អញ្ជើញ​មក​ជាមួយ​ក្រុម​គ្រួសារ ដើម្បីទស្សនាព្រឹត្តិការណ៍សាទរកម្ពុជានេះដែរ។ ពួកគាត់ពេញចិត្តជាខ្លាំង ចំពោះវត្ត​មាន​ច្រើន​កុះកររបស់អ្នកចូលរួម និងការតុបតែង ទោះបីពួកគាត់​ពុំទាន់​បាន​ទស្សនា​ការ​សម្ដែង​នានា​ក្នុង​កម្មវិធីយ៉ាងណាក្ដី។

ឈានចូលដល់ពេលរាត្រី ការសម្ដែងបានចាប់ផ្ដើម ពិសេសការដង្ហែក្បួនសាទរកម្ពុជា។ ការដង្ហែ​ក្បួន​សាទរ​កម្ពុជា ការដង្ហែទង់ជាតិព្រះរាជាណាចក្រកម្ពុជា ការសម្ដែងទម្រង់សិល្បៈនានា បាន​ផ្ដល់​នូវទស្សនីយភាពដ៏អស្ចារ្យ។ ការទះដៃ សម្លេងហ៊ោកញ្ជ្រៀវ បាន​បន្លឺ​ឡើង​រំពង​នៅ​គ្រប់​ចំណុច​ដែល​ក្បួនសាទរកម្ពុជា បានឆ្លងកាត់។ ពួកគាត់ដែលឈរទស្សនាក្បួនដង្ហែសាទរកម្ពុជានេះ ម្នាក់ៗកាន់ទូរស័ព្ទ​ផ្តិត​យក​រូប​ភាព​ស្រស់​ស្អាត ភ្ជាប់ជាមួយស្នាមញញឹមដែលបង្ហាញពីភាពពេញចិត្តជាខ្លាំង។ ពួកគាត់លើកឡើងថា កម្ម​វិធី​នេះ​ពិតជាអស្ចារ្យណាស់ បើមិនបានចូលរួមដោយផ្ទាល់នោះទេ គឺពិតជាសោកស្ដាយណាស់។

គួរបញ្ជាក់ថា ព្រឹត្តិការណ៍សាទរកម្ពុជា ជាកម្មវិធីលើកដំបូងដែលសហភាពសហ័ពន្ធយុវជនកម្ពុជា បាន​ផ្ដួចផ្ដើមរៀបចំឡើង។ កម្មវិធីបនេះប្រព្រឹត្តិទៅតាំងពេលរសៀល រហូតដល់ការបញ្ចប់ឆ្នាំ ២០២៤ ចូលឆ្នាំ ២០២៥៕ អត្ថបទ៖ គឹមហុក