ភ្នំពេញ៖ ខណៈព្រឹត្តិការណ៍ សាទរកម្ពុជា ទើបតែបិទបញ្ចប់ជាផ្លូវការនៅយប់ឆ្លងឆ្នាំចាស់ ឈានចូលឆ្នាំថ្មី២០២៥ ក្រុមប្រពលរដ្ឋដែលរស់នៅរាជធានីភ្នំពេញ និងមកពីបណ្តាខេត្ត បានសម្តែងនូវការអរគុណសន្តិភាព ដែលនាំឲ្យកើតឡើងនូវសមិទ្ធផលថ្មីៗជាច្រើននៅក្នុងប្រទេសកម្ពុជារហូតមកដល់សព្វថ្ងៃនេះ។
នៅក្នុងបទសម្ភាសន៍ជាមួយព័ត៌មាន ប៊ីធីវី នៅព្រឹកថ្ងៃទី១ ខែមករានេះ នៅមុខព្រះបរមរាជវាំង លោក ណាន រ៉ា ជាពលរដ្ឋមកពីខេត្តកំពង់ស្ពឺ បាននិយាយថា សន្តិភាពនៅកម្ពុជា ពិតជាបាននាំមកនូវការរស់នៅប្រកបដោយភាពសប្បាយរីករាយ និងមានសិទ្ធិសេរីភាពពេញលេញក្នុងការដើរលេងកម្សាន្តគ្រប់ទីកន្លែង។ ប្រសិនបើគ្មានសន្តិភាពទេ នោះក៏គ្មានការរស់នៅដោយភាពសម្បូរសប្បាយ និងមិនអាចជួបជុំគ្រួសារផងដែរ។
លោកបានបន្ថែមថា ជាក់ស្តែងបើសិនជាប្រទេសជួបបញ្ហាសង្រ្គាម ក៏មិនអាចរៀបចំនូវព្រឹត្តិការណ៍សាទរកម្ពុជាបានផងដែរ ដែលជាព្រឹត្តការណ៍ដ៏អស្ចារ្យ និងមានតម្លៃដ៏ធំធេងខ្លាំងណាស់ សម្រាប់ប្រជាជាតិកម្ពុជាទាំងមូល។
ស្រដៀងគ្នានេះ ក្រុមប្រជាពលរដ្ឋមកពីខណ្ឌពោធិ៍សែនជ័យ រាជធានីភ្នំពេញ និងមកពីខេត្តតាកែវ បានលើកឡើងថា កត្តាសន្តិភាពដែលរកបានដោយលំបាកពីប្រមុខថ្នាក់ដឹកនាំនៃរាជរដ្ឋាភិបាលកម្ពុជា ធ្វើឱ្យសង្គមជាតិមានឱកាសក្នុងការអភិវឌ្ឍ ថែមទាំងបង្កើតឱកាសការងារជាច្រើនដល់ប្រជាពលរដ្ឋគ្រប់ទីកន្លែង។ ភាពសុខសាន្តរបស់ពលរដ្ឋកម្ពុជា គឺបានមកពីកត្តាសន្តិភាព សន្តិភាពពាំនាំមកនូវស្នាមញញឹមដល់ពលរដ្ឋគ្រប់រូប ក៏ដូចជាកម្មករនិយោជិតនៅទូទាំងប្រទេស។
“សាទរកម្ពុជា” គឺជាព្រឹត្តិការណ៍នៃការអបអរសាទរដល់សង្គមមួយ ដែលប្រកបដោយភាពរស់រវើកជាមួយនឹងការបង្ហាញវិសេសភាពនៃ «អត្តសញ្ញាណ» ដោយសមានចិត្តសោមនស្សចំពោះអ្វីៗដែលឆ្លងកាត់ និងជ័យជម្នះ និងការលើកតម្កើង «មោទនភាព» ក្នុងភាពជាប្រជាជាតិមួយ។ ព្រឹត្តិការណ៍នេះ ជាការអបអរសាទរនូវគុណតម្លៃរួមគ្នា ដើម្បីបង្ហាញ «មោទនភាពចំពោះបណ្តាសមិទ្ធផលនៃការអភិវឌ្ឍសង្គមសេដ្ឋកិច្ចកម្ពុជាជាមួយការរក្សាបាននូវ«អត្តសញ្ញាណ» នៃប្រជាជាតិ និងប្រជាជន និង«ការអបអរសាទរ» ដល់ការរួមរស់ជាមហាគ្រួសារខ្មែរតែមួយ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
