នេះ គឺជាលើកដំបូង ចាប់តាំងពីកិច្ចព្រមព្រៀងឈប់បាញ់ ចូលជាធរមាន រយៈពេលមួយខែ និង ៤ថ្ងៃមុន ការល្បាតរួមគ្នានៃកងកម្លាំងប្រដាប់អាវុធលីបង់ និង កងកម្លាំងបណ្តោះអាសន្នរបស់អង្គការសហប្រជាជាតិនៅលីបង់ (UNIFIL) បានចូលទីប្រជុំជន Chamaa ក្នុងផ្នែកខាងលិច បន្ទាប់ពីអ៊ីស្រាអែលបានដកកងទ័ពចេញ។

កងទ័ព បានដាក់ពង្រាយនៅប៉ុស្តិ៍ផ្សេងៗ នៅពេលចាប់ផ្តើមនៃសង្រ្គាមជើងគោក ដែលចាប់ផ្តើមដោយយោធាអ៊ីស្រាអែល បានចូលទៅក្នុងទីប្រជុំជន និងភូមិជាច្រើន នៅទូទាំងតំបន់ព្រំដែន។ ទាហានអ៊ីស្រា អែល នៅតែស្ថិតក្នុងតំបន់មួយចំនួន បើទោះបីជាមានបទឈប់បាញ់ក៏ដោយ ដោយបន្តវាយកម្ទេចផ្ទះសម្បែង និងឈូសឆាយផ្លូវដែលខ្លួនអះអាងថា ជាទីតាំងរបស់ក្រុមហេសបូឡា។

អ៊ីស្រាអែល កំពុងអនុវត្តការដកកងទ័ពបណ្តើរៗពីតំបន់នេះ បើទោះបីជារយៈពេល៣៥ថ្ងៃ បានកន្លងផុតទៅ ចាប់តាំងពីបទឈប់បាញ់ ត្រូវបានព្រមព្រៀងគ្នា។ កងកម្លាំងអ៊ីស្រាអែល នៅមានពេល ២៥ថ្ងៃទៀតមុនពេលកំណត់ចុងក្រោយសម្រាប់ការដកទ័ពទាំងស្រុងរបស់ពួកគេ ក្នុងអំឡុងពេល ដែលយោធាលីបង់ត្រូវបានកំណត់ ដើម្បីដាក់ពង្រាយ និងធ្វើការលើការបោសសម្អាតតំបន់អាវុធខុសច្បាប់ ក្នុងការអនុវត្តដំណោះស្រាយសេចក្តីសម្រេចលេខ ១៧០១។

ក្រុមវិស្វករលីបង់ បានធ្វើដំណើរទៅកាន់ទីប្រជុំជន Chamaa ដើម្បីដោះគ្រាប់មិនទាន់ផ្ទុះ និងត្រួតពិនិត្យតំបន់នេះ មុនពេលឈរជើងនៅទីនោះ បន្ទាប់ពីកងទ័ពអ៊ីស្រាអែល ត្រូវបានដកចេញទាំងស្រុង។