ប្រធានាធិបតីអ៊ូសបេគីស្ថាន លោក Shavkat Mirziyoyev បានប្រកាសឆ្នាំ ២០២៥ ជាឆ្នាំនៃការការពារបរិស្ថាន និងសេដ្ឋកិច្ចបៃតងសម្រាប់ប្រទេសនេះ។ នេះបើយោងតាមសេវាសារព័ត៌មានរបស់ប្រធានាធិបតីនៅពេលឆ្នាំថ្មីចូលមកដល់។

សេចក្តីថ្លែងការណ៍ពីសេវាសារព័ត៌មាន បានលើកឡើងថា គោលដៅចម្បងរបស់ប្រទេស គឺដើម្បីបង្កើតតុល្យភាពប្រកបដោយនិរន្តរភាពរវាងប្រព័ន្ធសេដ្ឋកិច្ច និងបរិស្ថាន ក៏ដូចជាឱកាសកាន់តែច្រើនសម្រាប់អាជីវកម្ម។

មេដឹកនាំអ៊ូសបេគីស្ថានរូបនេះ បាននិយាយបន្ថែមទៀតថា ប្រទេសនេះ នឹងបន្តធ្វើការយ៉ាងម៉ឺងម៉ាត់ ដើម្បីការពារទ្រព្យសម្បត្តិឯកជន និងទាក់ទាញការវិនិយោគបរទេស ឲ្យកាន់តែសកម្មឡើង។

នៅក្នុងសុន្ទរកថារបស់ខ្លួន លោក Mirziyoyev បានវាយតម្លៃឆ្នាំ ២០២៤ ថា ជាឆ្នាំ«មានវិបុលភាព» និង    «គំនិតរបស់ប្រទេសអ៊ូសបេគីស្ថានថ្មី កំពុងក្លាយជាការពិត» ដោយបញ្ជាក់ថា អំណាចរបស់ប្រទេសនេះ កំពុងកើនឡើង នៅលើឆាកអន្តរជាតិ ក្នុងនាមជាប្រទេសប្រកួតប្រជែង និងជាដៃគូដែលអាចទុកចិត្តបាន។

ឆ្នាំ ២០២៤ ត្រូវបានប្រកាសថា ជាឆ្នាំនៃការគាំទ្រសម្រាប់យុវជន និងអាជីវកម្ម នៅអ៊ូសបេគីស្ថាន។