ប្រេស៊ីល៖ ខណៈដែលមេដឹកនាំពិភពលោកបានបង្ហាញការប្ដេជ្ញាចិត្តកាលពីថ្ងៃអង្គារ ក្នុងការបញ្ចប់ការកាប់បំផ្លាញព្រៃឈើនៅដំណាក់ទសវត្សរ៍នេះ ការប្រកាសនេះគឺវាហួសពេលហើយសម្រាប់ផ្នែកដ៏ធំនៃព្រៃទាក់ទាញទឹកភ្លៀង Amazon។ ទូរទស្សន៍អង់គ្លេស Sky News បានបង្ហាញពីវិសាលភាពដ៏ធំនៃតំបន់នានារបស់ព្រៃនេះនៅក្នុងរដ្ឋ Para របស់ប្រទេសប្រេស៊ីលត្រូវបានរងការលួចកាប់ឈើដោយខុសច្បាប់ ស្ទើរហិនហោចគ្មានសល់។
ដើមឈើត្រូវបានដុតបណ្ដាលឲ្យសាយភាពកាបូនដែលបានស្តុកទុកនៅក្នុងព្រៃនានា ធ្វើឲ្យព្រៃទាំងនោះចុះខ្សោយមុនពេលដើមឈើទាំងនោះត្រូវបានកាប់ ដែលធ្វើឲ្យខូចខាតដល់ប្រព័ន្ធអេកូឡូស៊ី និងការបន្ថយសមត្ថភាពរបស់ព្រៃអាម៉ាហ្ស៊ូនដែលមានតួនាទីជាអាងស្ដុកកាបូន។ សេចក្ដីប្រកាសមួយដែលធ្វើឡើងចេញពីជំនួបកំពូល ស្ដីពីបម្រែបម្រួលអាកាសធាតុរបស់អង្គការសហប្រជាជាតិលើកទី២៦ ឬ COP26 ក្នុងទីក្រុង Glasgow ដែនដី Scotland របស់អង់គ្លេសកាលពីថ្ងៃអង្គារបាននិយាយថា ប្រទេសជាង ១០០ បានព្រមព្រៀងគ្នាបញ្ឈប់ការកាប់បំផ្លាញព្រៃឈើនៅត្រឹមឆ្នាំ២០៣០។
ចក្រភពអង់គ្លេសនិយាយថា ខ្លួនបានទទួលការប្ដេជ្ញាចិត្តនានាពីបណ្ដាមេដឹកនាំពិភពលោក ដែលតំណាងឲ្យព្រៃឈើរបស់ពិភពលោកជាង ៨៥%។ ក្រុមអ្នកឃ្លាំមើលបាននិយាយថា ការបំពេញការសន្យាគឺជារឿងសំខាន់ណាស់ ក្នុងការទប់ស្កាត់បញ្ហាបម្រែបម្រួលអាកាសធាតុ ប៉ុន្តែខ្លះបានកត់សម្គាល់ថា ការសន្យាដែលបានធ្វើកាលពីកន្លងទៅទទួលបានផលតិចតួចប៉ុណ្ណោះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
