រដ្ឋមន្ត្រីក្រសួងព័ត៌មានរបស់ប្រទេសស៊ីរី នៅក្នុងរដ្ឋាភិបាលអន្តរកាលរបស់ប្រទេសនេះ បានប្រាប់សារព័ត៌មាន AFP ថា លោកកំពុងធ្វើការឆ្ពោះទៅរកការមានសេរីភាពសារព័ត៌មាន ហើយប្តេជ្ញាឲ្យមាន «ការបញ្ចេញមតិដោយសេរី» បន្ទាប់ពីត្រូវបានរឹតបន្តឹងជាច្រើនទសវត្សរ៍ ក្រោមការគ្រប់គ្រងរបស់អតីតមេដឹកនាំរបស់ប្រទេសនេះ។

ដោយនិយាយបន្ទាប់ពីក្រុមឧទ្ទាមដឹកនាំដោយក្រុមឥស្លាមនិយម កាលពីថ្ងៃទី៨ ខែធ្នូ បានបញ្ចប់រយៈពេលគ្រប់គ្រងច្រើនជាង ៥ប្រាំទសវត្សរ៍របស់ក្រុមគ្រួសារ Assad រដ្ឋមន្ត្រី លោក Mohamed al-Omar បានប្រាប់ថា៖ «យើងកំពុងធ្វើការ ដើម្បីលើកកម្ពស់សេរីភាពសារព័ត៌មាន និងការបញ្ចេញមតិ ដែលត្រូវបានរឹតបន្តឹងយ៉ាងខ្លាំងក្លា ជាវិស័យដែលត្រូវបានគ្រប់គ្រងដោយអតីតរដ្ឋាភិបាលរបស់លោក Bashar al-Assad»។

គួររំលឹកថា គណបក្ស Ba'ath ដែលកំពុងកាន់អំណាចរបស់ប្រទេសស៊ីរី និងគ្រួសារ Assad បានកាត់បន្ថយយ៉ាងខ្លាំងនូវគ្រប់ទិដ្ឋភាពនៃជីវិតប្រចាំថ្ងៃ ក្នុងនោះរួមទាំងសេរីភាពសារព័ត៌មាន និងការបញ្ចេញមតិដោយប្រព័ន្ធផ្សព្វផ្សាយ ជាឧបករណ៍របស់អ្នកកាន់អំណាច។

អង្គការអ្នកសារព័ត៌ាមនគ្មានព្រំដែន ដែលជាអង្គការឃ្លាំមើលសេរីភាពសារព័ត៌មាន បានដាក់ចំណាត់ថ្នាក់ប្រទេសស៊ីរីទី២ចុងក្រោយគេ នៅលើសន្ទស្សន៍សេរីភាពសារព័ត៌មានពិភពលោកឆ្នាំ២០២៤ ដោយនាំមុខតែប្រទេសអេរីទ្រា និងនៅពីក្រោយប្រទេសអាហ្វហ្គានីស្ថានដែលគ្រប់គ្រងដោយតាលីបង់៕