ប្រទេសរូម៉ានី និងប៊ុលហ្គារី បានលុបចោលការគ្រប់គ្រងព្រំដែនគោក ដើម្បីក្លាយជាសមាជិកពេញសិទ្ធិនៃតំបន់ធ្វើដំណើរដោយសេរី Schengen របស់សហភាពអឺរ៉ុប (EU) នៅថ្ងៃពុធ (ទី១ ខែមករា) នេះ ដោយចូលរួមជាមួយប្លុកនៃប្រទេស ដែលប្រជាជនអាចធ្វើដំណើរបានដោយមិនចាំបាច់ត្រួតពិនិត្យលិខិតឆ្លងដែន។

កាំជ្រួចភ្ញីបានបំភ្លឺពេញផ្ទៃមេឃនៅច្រកឆ្លងកាត់ជិតទីក្រុង Ruse ព្រំដែនប៊ុលហ្គារី ភ្លាមៗបន្ទាប់ពីនាឡិកាដើរដល់ម៉ោង ១២យប់ចូលថ្ងៃថ្មី ខណៈដែលរដ្ឋមន្ត្រីមហាផ្ទៃប៊ុលហ្គារី និងរ៉ូម៉ានី បានលើករនាំងជានិមិត្តរូប នៅលើស្ពានមិត្តភាពកាត់ទន្លេ Danube។ ច្រកឆ្លងកាត់នេះ គឺជាចំណុចឆ្លងកាត់ដ៏សំខាន់ សម្រាប់ពាណិជ្ជកម្មអន្តរជាតិ។

ការត្រួតពិនិត្យលើការធ្វើដំណើរ តាមផ្លូវអាកាស និងផ្លូវសមុទ្រពីប៊ុលហ្គារី និងរូម៉ានី ត្រូវបានដកចេញ នៅក្នុងខែមីនា ឆ្នាំ២០២៤ ប៉ុន្តែការត្រួតពិនិត្យផ្លូវគោក បានបន្តរហូតដល់ប្រទេសអូទ្រីស កាលពីខែមុន បានទម្លាក់ចោលការវេតូដែលខ្លួនបានរក្សា ដោយផ្ដល់ហេតុផលថា ត្រូវការចាំបាច់បន្ថែមទៀត ដើម្បីបញ្ឈប់ជនអន្តោប្រវេសន៍។

ការត្រួតពិនិត្យព្រំដែន រវាងប្រទេសបារាំង អាល្លឺម៉ង់ បែលហ្ស៊ិក ហូឡង់ និងលុចសំបួ ត្រូវបានលុបចោលជាលើកដំបូង ក្នុងឆ្នាំ១៩៨៥។ តំបន់ Schengen ឥឡូវនេះ គ្របដណ្តប់លើ ២៥ប្រទេស ក្នុងចំណោមរដ្ឋសមាជិកសហភាពអឺរ៉ុបទាំង២៧ ក៏ដូចជាអ៊ីស្លង់ លិចតិនស្តាញ ន័រវ៉ែស និងស្វីស។ អៀរឡង់ និងស៊ីប មិនមែនជាសមាជិកនៃតំបន់ Schengen នោះទេ៕