ទិន្នន័យឧតុនិយមរបស់ប្រទេសចិន បង្ហាញថា ឆ្នាំ២០២៤ គឺជាឆ្នាំមានអាកាសធាតុក្តៅបំផុតសម្រាប់ប្រទេសនេះ ចាប់តាំងពីកំណត់ត្រាបានចាប់ផ្តើមជាង ៦ទសវត្សរ៍មុនមក ជាឆ្នាំទីពីរជាប់ៗគ្នាហើយដែលព្រឹត្តិការណ៍បែបនេះត្រូវបានបំបែក។

យោងតាមគេហទំព័រអាកាសធាតុចិន ដែលជាទំព័រសេវាកម្មគ្រប់គ្រងដោយរដ្ឋបាលឧតុនិយមរបស់ទីក្រុងប៉េកាំង បានឱ្យដឹងថា សីតុណ្ហភាពជាមធ្យមថ្នាក់ជាតិមានកម្រិត ១០,៩២អង្សាសេ កាលពីឆ្នាំមុន ឡើងខ្ពស់ជាង ១អង្សាសេ លើសឆ្នាំ២០២៣។

ទិន្នន័យពីការិយាល័យឧតុនិយមក្រុងសៀងហៃ បានបង្ហាញកាលពីថ្ងៃពុធ ០១ មករា ថា សម្រាប់ទីក្រុងសៀងហៃ ដែលមានប្រជាជនច្រើន និងជាមជ្ឈមណ្ឌលហិរញ្ញវត្ថុរបស់ប្រទេសចិន ក៏មានអាកាសធាតុក្ដៅបំផុតនៅឆ្នាំ២០២៤ ចាប់តាំងពីសម័យរាជវង្សឈីងមក។ សីតុណ្ហភាពជាមធ្យមរបស់ទីក្រុងមាន ១៨,៨អង្សាសេ ដែលជាកម្ដៅដ៏ខ្លាំងក្លាចាប់តាំងពីកំណត់ត្រាឧតុនិយមរបស់ទីក្រុងសៀងហៃ បានចាប់ផ្តើមនៅឆ្នាំ១៨៧៣។

អាកាសធាតុកាន់តែក្តៅគគុកកាលពីឆ្នាំមុន អមដោយព្យុះមានកម្លាំងកាន់តែខ្លាំងក្លា និងភ្លៀងធ្លាក់កាន់តែច្រើន ក៏នាំឱ្យតម្រូវការប្រើប្រាស់ថាមពលកើនឡើងខ្ពស់នៅក្នុងប្រទេសសេដ្ឋកិច្ចធំទីពីររបស់ពិភពលោកមួយនេះផងដែរ៕