ក្រុមមន្ត្រីបាននិយាយថា រថយន្តតេល្លា សាយប៊ឺត្រាក់ (Tesla Cybertruck) ដ៏ទំនើប បានផ្ទុះឆេះនៅខាងក្រៅសណ្ឋាគារ ត្រាំ អ៊ិនធើណាស់ស៊ិនណល (Trump International Hotel) ក្នុងទីក្រុង ឡាសវេហ្គាស (Las Vegas) របស់សហរដ្ឋអាមេរិក កាលពីថ្ងៃពុធ (០១ មករា) ដោយសម្លាប់អ្នកបើកបរ និងធ្វើឱ្យមនុស្ស ៧នាក់រងរបួស ហើយ FBI កំពុងស៊ើបអង្កេតថា តើការផ្ទុះនេះជាអំពើភេរវកម្ម ឬយ៉ាងណា។

វីដេអូដែលថតដោយសាក្សីនៅខាងក្នុង និងខាងក្រៅសណ្ឋាគារ បានបង្ហាញពីរថយន្តកំពុងផ្ទុះ និងអណ្តាតភ្លើងឆាបឆេះចេញមកក្រៅ ខណៈរថយន្តចតនៅក្រៅសណ្ឋាគារ។ ឧបទ្ទវហេតុនេះ បានកើតឡើងប៉ុន្មានម៉ោងប៉ុណ្ណោះ បន្ទាប់ពីបុរសម្នាក់បានបើករថយន្តបំបុកក្នុងហ្វូងមនុស្សដែលកំពុងអបអរថ្ងៃបុណ្យចូលឆ្នាំថ្មីនៅទីក្រុង New Orleans សម្លាប់មនុស្ស ១៥នាក់។

សណ្ឋាគារ Trump International Hotel នៅ Las Vegas គឺជាផ្នែកមួយនៃអង្គការ Trump ជាក្រុមហ៊ុនរបស់លោកប្រធានាធិបតីជាប់ឆ្នោត Donald Trump ដែលនឹងត្រលប់មកសេតវិមានវិញនៅថ្ងៃទី២០ ខែមករា។ នាយកប្រតិបត្តិតេស្លា លោក Elon Musk ជាអ្នកគាំទ្រដ៏សំខាន់របស់លោក Trump ក្នុងយុទ្ធនាការប្រធានាធិបតីឆ្នាំ២០២៤ ហើយលោកក៏ជាទីប្រឹក្សារបស់ប្រធានាធិបតីជាប់ឆ្នោតរូបនេះផងដែរ។

ភ្នាក់ងារពិសេស FBI ទទួលបន្ទុកលើគ្រោះថ្នាក់នេះ លោក Jeremy Schwartz ប្រាប់អ្នកយកព័ត៌មានថា គេមិនទាន់ច្បាស់ថាតើការផ្ទុះនេះជាអំពើភេរវកម្ម ឬយ៉ាងណា ខណៈការស៊ើបអង្កេតកំពុងបន្ត។ លោក Elon Musk និយាយថា ការផ្ទុះនេះមិនពាក់ព័ន្ធនឹងប្រព័ន្ធ ឬម៉ាស៊ីន Cybertruck ផ្ទាល់នោះទេ៕