ជំនួយការជាន់ខ្ពស់ជាច្រើនរូបរបស់ប្រធានាធិបតីកូរ៉េខាងត្បូង លោក Yoon Suk Yeol បានដាក់សំណើលាលែងពីតំណែងទ្រង់ទ្រាយធំកាលពីថ្ងៃពុធ (០១ មករា) មួយថ្ងៃបន្ទាប់ពីការិយាល័យប្រធានាធិបតីបានសម្តែងការខកចិត្តចំពោះមេដឹកនាំស្តីទី លោក Choi Sang-mok ក្នុងការយល់ព្រមតែងតាំងចៅក្រមថ្មីពីររូបទៅកាន់តុលាការ ដែលកំណត់ជោគវាសនារបស់លោក Yoon។

ការិយាល័យប្រធានាធិបតីបាននិយាយនៅក្នុងសេចក្តីថ្លែងការណ៍មួយថា ប្រធានបុគ្គលិក ប្រធានគោលនយោបាយ ទីប្រឹក្សាសន្តិសុខជាតិ និងទីប្រឹក្សាពិសេសនៃកិច្ចការបរទេស និងសន្តិសុខរបស់លោក Yoon ក៏ដូចជាលេខាធិការជាន់ខ្ពស់ជាច្រើនរូបផ្សេងទៀត បានដាក់សំណើលាលែងពីតំណែងរបស់ពួកគេ។

ការិយាល័យប្រធានាធិបតីស្ដីទីនិយាយថា លោក Choi នឹងមិនទទួលយកការលាលែងពីតំណែងទាំងនោះទេ ខណៈអាទិភាពនៅពេលនេះ គឺផ្តោតលើការកែលម្អសេដ្ឋកិច្ច និងស្ថិរភាពកិច្ចការរដ្ឋ ស្របពេលវិបត្តិនយោបាយកំពុងបន្ត។

ក្រុមមន្រ្តីទាំងនោះបានសម្តែងពីចេតនារបស់ពួកគេក្នុងការចុះចេញពីតំណែងម្តងហើយម្តងទៀតបន្ទាប់ពីមានការប៉ុនប៉ងដ៏ចម្រូងចម្រាសរបស់លោក Yoon ក្នុងការប្រកាសច្បាប់អាជ្ញាសឹកកាលពីថ្ងៃទី០៣ ខែធ្នូ ប៉ុន្តែបើយោងតាមមន្ត្រីការិយាល័យប្រធានាធិបតីបានឱ្យដឹងថា ការលាលែងតំណែងរបស់ពួកគេមិនត្រូវបានទទួលយកឡើយ៕