កងទ័ពជើងទឹករបស់ប្រទេសប្រេស៊ីល បាននិយាយកាលពីថ្ងៃពុធថា ចំនួនអ្នកស្លាប់បានកើនឡើងដល់១២នាក់ បន្ទាប់ពីការបាក់ស្ពាននៅភាគខាងជើងប្រទេសប្រេស៊ីល កាលពីថ្ងៃទី២២ ខែធ្នូ ក្រោយសាកសពពីរនាក់ទៀត ត្រូវបានរកឃើញពីទន្លេ Tocantins ។

មនុស្ស៥នាក់នៅតែបាត់ខ្លួននៅឡើយ ចាប់តាំងពីឧបទ្ទវហេតុ បានកើតឡើងនៅលើស្ពាន Juscelino Kubitschek de Oliveira តាមបណ្តោយផ្លូវហាយវ៉េ តភ្ជាប់រដ្ឋ Tocantins និងរដ្ឋ Maranhao ។

យោងតាមសេចក្តីថ្លែងការណ៍ផ្លូវការ ពីសារព័ត៌មានរដ្ឋ Agencia Brasil បានរាយការណ៍ថា អ្នកមុជក្នុងជម្រៅទឹកតាមយុទ្ធសាស្ត្ររបស់កងទ័ពជើងទឹក នៅបន្តស្វែងរកជនរងគ្រោះ ដោយមានជំនួយពីនគរបាល និងក្រុមអ្នកពន្លត់អគ្គិភ័យ។

យ៉ាងហោចណាស់យានយន្តចំនួន១០គ្រឿង រួមទាំងរថយន្តដឹកទំនិញចំនួន៣គ្រឿង ផ្ទុកថ្នាំសម្លាប់សត្វល្អិត ២៥.០០០ លីត្រ និងអាស៊ីតស៊ុលផួរីចចំនួន ៧៦ តោន បានធ្លាក់ចូលទៅក្នុងទន្លេ នៅពេលស្ពានបាក់។

ទីភ្នាក់ងារទឹករបស់ប្រទេស បាននិយាយថា ការធ្វើតេស្តសំណាកទឹករបស់ពួកគេ បង្ហាញថា ពុំមានសារធាតុគីមីពុល នៅក្នុងទឹកនោះទេ។ អង្គភាពហេដ្ឋារចនាសម្ព័ន្ធដឹកជញ្ជូនជាតិ បានបើកការស៊ើបអង្កេតលើមូលហេតុនៃគ្រោះថ្នាក់នេះ។