បណ្ដារោងចក្រនៅអាស៊ី បានបញ្ចប់ឆ្នាំ២០២៤ ក្នុងជំហរយ៉ាងទន់ខ្សោយបំផុត ខណៈការរំពឹងទុកសម្រាប់ឆ្នាំថ្មីក៏បានធ្លាក់ចុះ ស្របពេលមានកំណើនហានិភ័យកាន់តែខ្លាំងនៃសង្រ្គាមពាណិជ្ជកម្មពីអាណត្តិថ្មីរបស់លោកប្រធានាធិបតីអាមេរិក Donald Trump និងការស្ទុះងើបឡើងវិញនៃសេដ្ឋកិច្ចដ៏ផុយស្រួយរបស់ប្រទេសចិន។

សន្ទស្សន៍គ្រប់គ្រងការបញ្ជាទិញ PMI សម្រាប់ខែធ្នូ ពីទូទាំងតំបន់ដែលបានចេញផ្សាយនៅថ្ងៃព្រហស្បតិ៍ (០២ មករា) នេះ បានបង្ហាញពីសកម្មភាពរបស់រោងចក្រមានការថយចុះនៅប្រទេសចិន និងកូរ៉េខាងត្បូង ទោះជាមានសញ្ញាមួយចំនួននៃការកើនឡើងនៅកោះតៃវ៉ាន់ និងអាស៊ីអាគ្នេយ៍ក៏ដោយ។

ប្រធានាធិបតីជាប់ឆ្នោតរបស់សហរដ្ឋអាមេរិក លោក Trump បានសន្យាថានឹងដាក់ពន្ធធំៗលើការនាំចូលពីដៃគូពាណិជ្ជកម្មធំៗចំនួនបីគឺម៉ិកស៊ិក កាណាដា និងចិន ដែលរំពឹងថានឹងប៉ះពាល់ដល់ប្រទេសនាំចេញធំៗផ្សេងទៀត និងសកម្មភាពអាជីវកម្មសកលកាន់តែទូលំទូលាយ។

សន្ទស្សន៍បញ្ជាទិញ PMI សម្រាប់ប្រទេសចិន បានធ្លាក់ចុះមកត្រឹម ៥០,៥ ក្នុងខែធ្នូ ពីតួលេខ ៥១,៥ កាលពីខែមុននោះ ដោយឆ្លុះបញ្ចាំងពីការព្យាកររបស់អ្នកវិភាគដែលព្រមានពីកំណើនតិចតួចក្នុងសកម្មភាពរោងចក្រ។ នោះក៏បានស្ដែងឱ្យឃើញតាមរយៈការស្ទង់មតិផ្លូវការ ដែលចេញផ្សាយនៅដើមសប្តាហ៍នេះថា សកម្មភាពរោងចក្រស្ទើរតែមិនកម្រើកនោះទេ៕