ក្នុងឆ្នាំថ្មី ២០២៥នេះ មន្រ្តីរាជការស៊ីវិលបានប្តេជ្ញាខិតបំពេញការងារឱ្យបានល្អ ស្របពេលដែលដែលរាជរដ្ឋាភិបាលបានយកចិត្តទុកពីសុខទុក្ខមន្រ្តីរាជការស៊ីវិលទាំងថ្នាក់ជាតិ និងថ្នាក់ក្រោមជាតិ ដោយសម្រេចដំឡើងប្រាក់បៀវត្សប្រចាំខែជូនពួកគេ។

មន្រ្តីរាជស៊ីវិលថ្នាក់ក្រោមជាតិ នៅថ្ងៃទី០២ ខែមករា ឆ្នាំ២០២៥នេះ បានប្រាប់BTVឱ្យដឹងថា ការដំឡើងប្រាក់បៀវត្សប្រចាំខែក្នុងឆ្នាំថ្មីជូនដល់ពួកគេ បានចូលរួមចំណែកលើកកម្ពស់ជីវភាពរស់នៅប្រចាំថ្ងៃបានសមរម្យ និងប្តេជ្ញាខិតខំបំពេញការងារឱ្យល្អបន្ថែមទៀត ក្នុងការផ្តល់សេវាសាធារណៈជូនប្រជាពលរដ្ឋរស់នៅក្នុងមូលដ្ឋាន។ លើសពីនេះ មន្រ្តីរាជស៊ីវិលថ្នាក់ក្រោមជាតិ បានថ្លែងអំណគុណចំពោះសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ដែលតែងតែគិតគូរពីសុខទុក្ខដល់ពួកគេ។

យោងតាមអនុក្រឹត្យស្តីពីការកែប្រែ និងការដំឡើងប្រាក់បំណាច់មុខងារមន្រ្តីរាជការស៊ីវិលក្នុងឆ្នាំ២០២៥នេះ បង្ហាញពីវិស័យចំនួន៤រួមមាន៖ ទី១.វិស័យរដ្ឋបាល ការទូត និងបច្ចេកទេស ដែលបែងចែកជាពីរផ្នែករួមមាន៖នៅថ្នាក់ជាតិមានតួនាទីចាប់ពីមន្រ្តីបច្ចេកទេសបឋម រហូត ដល់អគ្គលេខាធិការ ទទួលបានប្រាក់បៀវត្សចាប់ពី ៧ សែនរៀល រហូតដល់៥លានរៀល។ រីឯមន្រ្តីថ្នាក់ក្រោមជាតិ ចាប់ពីឧទ្យានុរក្ស រហូតដល់អភិបាលរាជធានី-ខេត្ត ទទួលបានប្រាក់បៀវត្សប្រចាំខែ ចាប់ពី ៧សែនរៀល រហូតដល់ជាង ១លានរៀល។ ទី២.វិស័យអប់រំ បែងចែកជាពីរផ្នែករួមមាន៖ ទី១.ផ្នែកអប់រំទូទៅ តួនាទីចាប់ពីអនុប្រធានការិយាល័យរហូតដល់នាយកសាលាទទួលបានប្រាក់បៀវត្សចាប់ពី ៧៥ម៉ឺនរៀល រហូតដល់ជិត ២លានរៀល ទី២.ផ្នែកអប់រំពិសេស តួនាទីចាប់ពី លេខាធិការរដ្ឋបាល រហូតដល់នាយកវិទ្យាស្ថាន ទទួលបានប្រាក់បៀវត្សចាប់ពី ១លាន ៤៤ម៉ឺនរៀល រហូត ១លាន ៨៦ម៉ឺនរៀល។ ទី៣.វិស័យសុខាភិបាល តួនាទីចាប់ពីអ្នកជំនួយការព្យាបាល រហូតដល់អគ្គនាយកមន្ទីរពេទ្យ ទទួលបានប្រាក់បៀវត្សចាប់ពី ៧សែនរៀល រហូតដល់ជាង ១លានរៀល និងទី៤.វិស័យយុត្តិធម៌ តួនាទីចាប់ពីអនុប្រធានការិយាល័យរហូតដល់ប្រធានបណ្ឌិត្យសភាភូមិន្ទយុត្តិធម៌កម្ពុជា ទទួលបានប្រាក់បៀវត្សចាប់ពី ៧សែន ៧ម៉ឺនរៀល រហូតដល់ជិត ២លានរៀល។ក្រៅពី ការចេញអនុក្រឹត្យដំឡើងប្រាក់បំណាច់មុខងារមន្រ្តីរាជការស៊ីវិល រាជរដ្ឋាភិបាលបាលក៏បានចេញអនុក្រឹត្យដំឡើងប្រាក់បៀវត្សដល់ស្ថាប័ននានាទៀតដូចជា៖មន្រ្តីនគរបាលជាតិ កងទ័ព អតីតយុទ្ធជន និងគ្រូពុទ្ធិកសិក្សាជាដើម៕ អត្ថបទ៖ទូច សោភ័ណ