ក្រុមឃ្លាំមើលសិទ្ធិមនុស្សស៊ីរីដែលបានតាមដានស្ថានការណ៍សង្គ្រាម បាននិយាយកាលពីថ្ងៃពុធថា មនុស្សជាង ៥២៨.៥០០នាក់ ត្រូវបានសម្លាប់ នៅក្នុងសង្គ្រាមស៊ីវិលស៊ីរី។  

ចំនួនអ្នកស្លាប់សរុបរាប់បញ្ចូលទាំងមនុស្សរាប់ពាន់នាក់ ដែលត្រូវបានសម្លាប់ ចាប់តាំងពីឆ្នាំ ២០១១ ដែលទើបតែត្រូវបានបញ្ជាក់ថា បានស្លាប់នាពេលថ្មីៗនេះ ជាមួយនឹងការចូលទៅកាន់មជ្ឈមណ្ឌលឃុំឃាំង និងរណ្តៅកប់សាសពធំៗមួយចំនួន កាន់តែងាយស្រួល បន្ទាប់ពីការក្រុមក្រុមឧទ្ទាម បានផ្តួលរំលំលោកប្រធានាធិបតី បាសា អាល់អាសាដ (Bashar Assad)។

ក្រុមឃ្លាំមើលដែលមានមូលដ្ឋាននៅចក្រភពអង់គ្លេស បាននិយាយថា មនុស្ស ៦.៧៧៧នាក់ ដែលជាងពាក់កណ្តាលនៃពួកគេ ជាជនស៊ីវិល ត្រូវបានសម្លាប់ ក្នុងឆ្នាំ ២០២៤ នៅក្នុងការប្រយុទ្ធគ្នា នៅក្នុងប្រទេសស៊ីរី។

សារព័ត៌មាន AFP មិនអាចផ្ទៀងផ្ទាត់ដោយឯករាជ្យនូវតួលេខទាំងនេះបានទេ។

សង្រ្គាមស៊ីវិលនៅប្រទេសស៊ីរី បានផ្ទុះឡើង ក្នុងឆ្នាំ ២០១១ បន្ទាប់ពីរដ្ឋាភិបាល បានគាបសង្កត់យ៉ាងឃោរឃៅ លើការតវ៉ាគាំទ្រលទ្ធិប្រជាធិបតេយ្យ ដោយបង្កឲ្យមានជម្លោះដ៏មហន្តរាយ ដែលជំរុញឲ្យ មនុស្សរាប់លាននាក់ភៀសខ្លួន ទៅក្រៅប្រទេស និងទាក់ទាញមហាអំណាចបរទេសឲ្យពាក់ព័ន្ធ។ កាលពីឆ្នាំមុន ជនស៊ីវិល ៣.៥៩៨នាក់ រួមទាំងស្ត្រី ២៤០ នាក់ និងកុមារ ៣៣៧ នាក់ ត្រូវបានសម្លាប់ នៅទូទាំងប្រទេសស៊ីរី។ នេះបើយោងតាមក្រុមឃ្លាំមើលសិទ្ធិនេះ។

អ្នកឃ្លាំមើល បានបញ្ជាក់ថា លើសពីនេះទៅទៀត យុទ្ធជនចំនួន ៣.១៧៩ នាក់ ត្រូវបានសម្លាប់ រួមទាំងទាហានមកពី «របបលោកអាសាដ » ប៉ុន្តែក៏មាន «ក្រុមប្រដាប់អាវុធឥស្លាម» និងក្រុមជីហាដផងដែរ។